ఓయూ, వెలుగు: ఈ అకడమిక్ ఇయర్ నుంచి ఉస్మానియా యూనివర్సిటీలో కొత్త నిబంధనలు అమల్లోకి రానున్నాయి. ఇకపై పీజీ కోర్సుల్లో ప్రతి సెమిస్టర్ కు నాలుగు పేపర్లే ఉండనున్నాయి. క్రెడిట్స్ ను కూడా తగ్గించాలని అధికారులు నిర్ణయించారు. ప్రస్తుతం పీజీ కోర్సుల్లో 96 క్రెడిట్స్ ఉండగా, ఈ ఏడాది నుంచి వాటిని 80కి తగ్గించనున్నారు. ఈ విధానాన్ని కొంతమంది డీన్లు, ప్రొఫెసర్లు, స్టూడెంట్లు వ్యతిరేకిస్తున్నప్పటికీ అమలు చేయాలని వర్సిటీ అధికారులు నిర్ణయించారు. దీనివల్ల స్టూడెంట్లకు తీవ్ర నష్టం జరుగుతుందని ప్రొఫెసర్లు చెబుతున్నా... ఈ విధానం దేశంలోని మెజార్టీ సెంట్రల్ యూనివర్సిటీల్లో అమలవుతోందని, యూజీసీ నిబంధనల మేరకే ఈ విధానం అమలు చేయాలని నిర్ణయించామని వర్సిటీ అధికారులు చెబుతున్నారు.
‘‘నేషనల్ ఎడ్యుకేషన్పాలసీ ప్రకారం పీజీ కోర్సుల్లో క్రెడిట్స్80కి తగ్గకుండా ఉండాలి. అంతేగానీ 80 మాత్రమే ఉండాలనే రూల్స్ ఎక్కడా లేవు. ఈ విధానాన్ని దేశంలోని కొన్ని సెంట్రల్ యూనివర్సిటీలు మాత్రమే అమలు చేస్తున్నాయి. స్టేట్ యూనివర్సిటీల్లో ఎక్కడా లేదు. పీజీ కోర్సుల్లో క్రెడిట్స్ ఎంత ఎక్కువుంటే విదేశీ యూనివర్సిటీలలో అంత ప్రాధాన్యం ఉంటుంది. తక్కువ క్రెడిట్స్ తో సర్టిఫికెట్లు పొందిన స్టూడెంట్లు అమెరికా, బ్రిటన్, కెనడా లాంటి దేశాల్లో అడ్మిషన్లు పొందలేరు” అని సీనియర్ ప్రొఫెసర్లు అంటున్నారు.
