- పాతబస్తీలో అగ్ని ప్రమాదాల నివారణకు కఠిన చర్యలు
- ఓల్డ్ సిటీ ఎమ్మెల్యేలతో డిప్యూటీ సీఎం, మంత్రి పొన్నం ప్రభాకర్ రివ్యూ
హైదరాబాద్ సిటీ, వెలుగు: హైదరాబాద్ మహానగరాన్ని ప్రపంచ నగరంగా తీర్చిదిద్దడానికి ఎన్ని నిధులనైనా వెచ్చించడానికి సీఎం రేవంత్ రెడ్డి సిద్ధంగా ఉన్నారని డిప్యూటీ సీఎం భట్టి విక్రమార్క ప్రకటించారు. ఓల్డ్ సిటీ అభివృద్ధి పనులపై హైదరాబాద్ జిల్లా ఇన్‌ఛార్జి మంత్రి పొన్నం ప్రభాకర్తో కలిసి రాష్ట్ర సచివాలయంలో గురువారం ఆయన రివ్యూ మీటింగ్ నిర్వహించారు. చార్మినార్, మలక్‌పేట్, కార్వాన్, యాకుత్ పురా, చాంద్రాయణగుట్ట, బహదూర్‌పుర, నాంపల్లి అసెంబ్లీ నియోజకవర్గాల్లో జరుగుతున్న అభివృద్ధి పనులను ఒక్కొక్కటిగా సమీక్షించి, పురోగతిపై అధికారులను అడిగి తెలుసుకున్నారు.
ఓల్డ్సిటీలోని వారసత్వ కట్టడాలను కాపాడుకుంటూనే, దాన్ని మరింతగా అభివృద్ధి చేసుకుందామన్నారు. పాత నగరంలో అగ్నిప్రమాదాలు పునరావృతం కాకుండా పకడ్బందీ చర్యలు తీసుకుంటామని ఈ సందర్భంగా ఉప ముఖ్యమంత్రి హామీ ఇచ్చారు. రాష్ట్ర చరిత్రలో ఎన్నడూ లేని విధంగా హైదరాబాద్ నగర అభివృద్ధికి బడ్జెట్‌లో 10 వేల కోట్ల రూపాయలు కేటాయించడం పట్ల ఎంఐఎం ఎమ్మెల్యేలు ప్రజా ప్రభుత్వానికి కృతజ్ఞతలు తెలిపారు. ఈ సమావేశంలో ఓల్డ్సిటీ ఎమ్మెల్యేలు, ప్రత్యేక ప్రధాన కార్యదర్శులు, ఇతర ఉన్నతాధికారులు పాల్గొన్నారు.
