- సెలవు రోజు కావడంతో పోటెత్తిన భక్తులు
- నిమజ్జనాలతో సందడిగా ట్యాంక్బండ్ పరిసరాలు
హైదరాబాద్ సిటీ, వెలుగు : ట్యాంక్ బండ్, ఖైరతాబాద్పరిసరాలు ఆదివారం సందడిగా మారాయి. సెలవురోజు కావడంతో ఖైరతాబాద్ మహా గణపతి దర్శనానికి భక్తులు పోటెత్తగా, ఐదో రోజు గణేశ్ నిమజ్జనాలు హుస్సేన్ సాగర్లో జోరుగా సాగాయి. వర్షం పడుతున్నా లెక్క చేయకుండా గంటల తరబడి భక్తులు క్యూలైన్లలో నిలబడి శ్రీవిశ్వశాంతి మహాశక్తి గణపతిని దర్శించుకున్నారు.
ఆదివారం ఒక్కరోజే 4 లక్షలకుపైగా భక్తులు స్వామివారిని దర్శించుకున్నట్టు ఖైరతాబాద్ గణేశ్ ఉత్సవ సమితి నిర్వాహకులు తెలిపారు. కేంద్ర మంత్రి కిషన్రెడ్డి స్వామివారిని దర్శించుకొని, హారతి ఇచ్చారు. భక్తుల రద్దీని దృష్టిలో పెట్టుకొని మెట్రో, ఎంఎంటీఎస్, ఆర్టీసీ బస్సు సర్వీసులు అర్ధరాత్రి వరకు నడిచాయి.
