సరైన మాడ్యూల్స్ తెస్తేనే భూ సమస్యలకు పరిష్కారం
ప్రస్తుతం ఉన్న మాడ్యూల్స్లోనూ మార్పులు చేయాలి
రాష్ట్ర ప్రభుత్వానికి స్పష్టం చేసిన కలెక్టర్లు
హైదరాబాద్, వెలుగు: భూ సమస్యల పరిష్కారానికి ధరణి పోర్టల్లో సరైన మాడ్యూల్స్ తెచ్చిన తర్వాతే రెవెన్యూ సదస్సులు పెట్టి దరఖాస్తులు తీసుకుంటే ఫలితం ఉంటుందని, లేకపోతే కష్టమని ప్రభుత్వానికి కలెక్టర్లు స్పష్టం చేశారు. కొన్ని అప్లికేషన్లకు ఫీల్డ్ఎంక్వైరీ తప్పనిసరి కావడం, దీనికి సిబ్బంది లేకపోవడం కూడా సమస్యగా మారిందని తెలిపారు. మొన్నటి వరకు అనేక రకాలుగా దరఖాస్తులు తీసుకున్నప్పటికీ అవి పరిష్కారం కాకపోగా.. ప్రభుత్వంపై తీవ్ర వ్యతిరేకత వచ్చింది. పూర్తి స్థాయిలో ధరణి మాడ్యూల్స్ అందుబాటులోకి లేకపోవడం, ఒకేసారి రైతులు దరఖాస్తులతో పోటెత్తితే ఏం జరుగుతుందోనన్న భయంతో రెవెన్యూ సదస్సులు ప్రభుత్వం వాయిదా వేసిందనే చర్చ అధికార వర్గాల్లో నడుస్తున్నది. రెవెన్యూ సదస్సులు ఎలా పెట్టాలి? ధరణిలో ఉన్న మాడ్యూల్స్.. ఇంకా చేపట్టాల్సిన మార్పులపై సీఎస్ సోమేశ్కుమార్ కలెక్టర్లతో చర్చించారు. ఈ సందర్భంగా కలెక్టర్లు పలు సమస్యలను ప్రభుత్వం దృష్టికి తెచ్చారు. ప్రస్తుతం ధరణిలో 33 రకాల ట్రాన్సాక్షన్ మాడ్యూల్స్తో పాటు మరో 11 రకాల ఇన్ఫర్మేషన్ మాడ్యూల్స్ అందుబాటులో ఉన్నాయి. వీటితో పాటు ఇంకా అనేక మాడ్యూల్స్ రావాల్సి ఉందని కలెక్టర్లు తెలిపారు.
ఇవి ఎట్లా చేయాలో చెప్పండి..
అగ్రికల్చర్ అసైన్డ్ ల్యాండ్స్ సక్సెషన్ , విస్తీర్ణంలో మార్పులు చేర్పులు, మిస్సింగ్ సర్వే నెంబర్లు వంటి అంశాల్లో ఇబ్బందులు తలెత్తుతున్నట్లు కలెక్టర్లు ప్రభుత్వానికి నివేదించారు. ధరణి కంటే ముందు అన్ సైన్డ్ అయిన అసైన్డ్ ల్యాండ్స్ డిజిటల్ సైన్ కోసం అప్లై చేసుకునేందుకు చాన్స్ లేదు. ఫలితంగా అసైన్డ్ ల్యాండ్స్ పాసు పుస్తకాలు తీసుకోలేకపోతున్నారు. దీనిపై కూడా స్పష్టమైన మాడ్యూల్ రావాలి.
కలెక్టర్ లాగిన్కు వచ్చిన అప్లికేషన్లు 14 రోజు ల్లో పరిష్కారించాలి. దీనికోసం నోటీసు ఇవ్వాల్సి ఉంటుంది. అవసరమైన ఎంక్వైరీ చేసి దాని ఆధారంగా నిర్ణయం తీసుకోవాలి. అయితే కలెక్టర్లు రోజువారీ పనుల బిజీ వల్ల దరఖాస్తులకు నెలలు గడుస్తున్నా మోక్షం కలగడం లేదు. ఈ గడువును పెంచాలని కలెక్టర్లు కోరుతున్నారు. లేదంటే కొన్ని ధరణి పనులు ఇతర ఆఫీసర్లకు అప్పగించాలని సూచిస్తున్నారు.
విస్తీర్ణంలో మార్పులు, చేర్పులకు సంబంధించి తీవ్ర గందరగోళంలో నెలకొంది. ఒక పట్టాదారుకు ఉన్నదానికంటే తక్కు వ విస్తీర్ణం పాసుపుస్తకంలో నమోదైతే.. అదే సర్వే నెంబర్లో ఉన్న ఇతర పట్టాదారులకు ఎలాంటి ఎఫెక్ట్ లేకుంటే దాన్ని కలెక్టర్ నిర్ణయం తీసుకుని చేయొచ్చు. ఇందుకోసం ధరణి, ఐఎల్ఆర్ఎంఎస్, వెబ్ ల్యాండ్ ఆధారంగా చేయాల్సి ఉంటుంది. అయితే ఇతర పట్టాదారుల సర్వే నెంబర్లో ఉన్నదానికంటే ఎక్కువ విస్తీర్ణం నమోదైనట్లయితే దానిని తొలగించి ఎవరికి చెందాలో వారికి ఇవ్వడానికి ఇబ్బందులు వస్తున్నాయి. ఇందుకోసం ఎక్కువ విస్తీర్ణం నమోదైన పట్టాదారు స్వయంగా తనకు ఎక్కువ విస్తీర్ణం వచ్చిందని ఆన్లైన్లో రూ.1,000 కట్టి అప్లై చేసుకుంటేనే తొలగిస్తారు. ఇందుకోసం ఎవరూ ముందుకు రావడం లేదు. ఇలాంటి విషయాల్లో సుమోటోగా స్వీకరించి మార్పులు, చేర్పులు చేసేందుకు అవకాశం ఇవ్వాలని కలెక్టర్లు కోరుతున్నారు.
నాలా నుంచి అగ్రికల్చర్కు కన్వర్షన్ కోసం మాడ్యూల్ తెచ్చినప్పటికీ దాంట్లో ఎలాంటి సర్వే నెంబర్లు చూపెట్టడం లేదు. ఇలా ఎన్నో సమస్యలు ఉన్నాయని, వాటి పరిష్కారం కోసం పూర్తి స్థాయిలో మాడ్యూల్స్ తెచ్చిన తర్వాతే రెవెన్యూ సదస్సులు పెట్టి, దరఖాస్తులు తీసుకోవడం బెటర్ అని కలెక్టర్లు ప్రభుత్వానికి తెలిపారు.