- జీతాలు పెంచకుంటే
- 17 నుంచి సమ్మె చేస్తామని నోటీసు
పద్మారావునగర్, వెలుగు: ఈఎస్ఐ డైరెక్టరేట్పరిధిలోని ఔట్ సోర్సింగ్ స్టాఫ్ నర్సులకు.. ప్రభుత్వ హాస్పిటళ్లలో పనిచేస్తున్న ఔట్ సోర్సింగ్ స్టాఫ్
నర్సులతో సమానంగా జీతాలివ్వాలని డిమాండ్ చేస్తూ గురువారం భోలక్పూర్లోని ఈఎస్ఐ డైరెక్టరేట్ ఆఫీస్ ఎదుట ఏఐటీయూసీ ఆధ్వర్యంలో ధర్నా నిర్వహించారు. ఈ సందర్భంగా తెలంగాణ మెడికల్ కాంట్రాక్ట్ ఎంప్లాయీస్ అండ్ వర్కర్స్ యూనియన్ ఈఎస్ఐ వింగ్ (ఏఐటీయూసీ) అధ్యక్ష, ప్రధాన కార్యదర్శులు ఎండీ యూసుఫ్, ఎం నరసింహ మాట్లాడుతూ.. గత 15 ఏండ్లుగా ఈఎస్ఐ డైరెక్టరేట్పరిధిలోని నాచారం, ఆర్సీ పురం, జీడిమెట్ల, వరంగల్ జేడీ, హైదరాబాద్ జేడీ పరిధిలో 300 మంది నర్సింగ్ సిబ్బంది ఔట్సోర్సింగ్ పద్ధతిలో పనిచేస్తున్నారని, వీరికి ప్రభుత్వ ఆసుపత్రుల్లో పనిచేస్తున్న ఔట్సోర్సింగ్ సిబ్బందికి ఇస్తున్నట్లుగా రూ.32,368 కాకుండా, కేవలం రూ.22,750 మాత్రమే ఇస్తున్నారని తెలిపారు.
ఈ విషయంపై రెండేండ్లుగా అధికారుల చుట్టూ తిరుగుతున్నామన్నారు. ఈఎస్ఐ డైరెక్టరేట్లోని ఆఫీసర్ల నిర్లక్ష్యంతో వారి జీతాలు పెరగడం లేదన్నారు. వెంటనే జీతాలు పెంచాలని, లేకుంటే ఈ నెల 17 నుంచి రాష్ట్ర వ్యాప్తంగా సమ్మెకు దిగుతామని నర్సులు హెచ్చరించారు. అనంతరం ఈఎస్ఐ అసిస్టెంట్ డైరెక్టర్బాలాజీకి సమ్మె నోటీసు అందజేశారు.
తమకు కూడా పీఆర్సీ వర్తింపజేయాలని, 35 క్యాజువల్ లీవులు ఇవ్వాలని, ఏరియర్స్తో కూడిన జీతాల పెంపు అమలు చేయాలని కోరారు. కార్యక్రమంలో ఏఐటీయూసీ రాష్ట్ర నాయకులు వెంకటరాజ్యం, బొడ్డుపల్లి కిషన్, నర్సింగ్ సిబ్బంది నాగమణి, మేరీ, సుమలత, కళ్యాణి తదితరులు పాల్గొన్నారు.
