నాగర్కర్నూల్, వెలుగు: కాంగ్రెస్లో చేరేందుకు సిద్ధమైన సీనియర్లీడర్లు పార్టీ హైకమాండ్ ముందు డిమాండ్లు పెడుతుంటే, నియోజకవర్గాల స్థాయిలో తామే బాసులమని ఇన్చార్జీలు ధీమాగా ఉన్నారు. కొత్తగా ఎవరు చేరినా తమ పరిధిలో పని చేయాల్సిందేనని కొంచెం గట్టిగానే చెబుతున్నారు. సోమవారం పెద్దకొత్తపల్లి మండల కేంద్రంలో మీటింగ్ నిర్వహించిన కాంగ్రెస్ నేతలు సీఆర్ జగదీశ్వర్రావును కాదని జూపల్లికి టికెట్ ఇస్తే ఓడిస్తామని స్పష్టం చేశారు.
కొల్లాపూర్, కోడేరు మండలాల్లో ఇదే తరహా మీటింగులు నిర్వహించారు. నాగర్ కర్నూల్ నియోజకవర్గంలో బిజినేపల్లి మండల పార్టీ ప్రెసిడెంట్, ఎంపీటీసీ కూచుకుళ్ల సుహాసన్రెడ్డితో పాటు ఆయన వర్గీయులు నాగం జనార్ధన్రెడ్డి తమను అణచివేస్తున్నారని పీసీసీ నేతలకు కంప్లైంట్ ఇచ్చారు. తాను టికెట్ రేస్లో ఉన్నట్లు ప్రచారం చేసుకుంటున్నారు. ఇప్పుడు ఎమ్మెల్సీ కూచుకుళ్ల దామోదర్రెడ్డి, ఆయన కొడుకు డా.రాజేశ్రెడ్డి కాంగ్రెస్లో చేరాలని నిర్ణయించుకోవడంతో నాగర్ కర్నూల్ కాంగ్రెస్ రాజకీయాలు హీటెక్కుతున్నాయి. ఢిల్లీలో ఏఐసీసీ కార్యకలాపాలకు పరిమితమైన మాజీ ఎమ్మెల్యే వంశీచంద్రెడ్డి కల్వకుర్తి నుంచి తానే పోటీ చేస్తానని, రాష్ట్రంలో ప్రభుత్వ ఏర్పాటులో కీలకపాత్ర పోషిస్తానని అంటున్నారు.
చేరకముందే అసమ్మతి..
ఉమ్మడి జిల్లా రాజకీయాలను ప్రభావితం చేస్తానని భావిస్తున్న మాజీ మంత్రి జూపల్లి కృష్ణారావు కాంగ్రెస్లో చేరడానికి ముందే అసమ్మతిని ఎదుర్కోవాల్సిన పరిస్థితి నెలకొంది. 11 ఏండ్లు బీఆర్ఎస్లో కొనసాగిన జూపల్లి, పొంగులేటి శ్రీనివాస్ రెడ్డితో కలిసి కాంగ్రెస్లో చేరేందుకు పావులు కదిపారు. కాంగ్రెస్ సీనియర్ నేతలతో వరుస భేటీలు నిర్వహించారు. కొల్లాపూర్ నుంచి కాంగ్రెస్ టికెట్పై జూపల్లి పోటీ చేయడం ఖాయమన్న వార్తలతో ఇక్కడి కాంగ్రెస్ లీడర్లు గుర్రుగా ఉన్నారు. జూపల్లి వచ్చినా.. ఇంకెవరు వచ్చినా తన కింద పనిచేయాల్సిందేనని, కాంగ్రెస్ నుంచి తానే పోటీ చేస్తానని పీసీసీ మెంబర్ సీఆర్ జగదీశ్వర్రావు కార్యకర్తలతో చెబుతున్నారు. టీపీసీసీ కార్యదర్శి రంగినేని అభిలాశ్రావ్ కూడా తాను టికెట్ రేస్లో ఉన్నానని ప్రకటించారు. వీరి ముగ్గురితో పాటు మహిళా కాంగ్రెస్ రాష్ట్ర ప్రధాన కార్యదర్శి తిరుపతమ్మ లైన్లో ఉన్నారు. ఇక బీఆర్ఎస్ నుంచి ఎమ్మెల్సీ కూచుకుళ్ల దామోదర్ రెడ్డి పార్టీలోకి వస్తే ఆహ్వానిస్తామన్న మాజీ మంత్రి డా.నాగం ఈసారి తాను అసెంబ్లీలో ఉండడం అవసరమని, తానే అభ్యర్థినని డైరెక్ట్గా ప్రకటించారు.
కలుపుకొని వెళ్లడం సాధ్యపడేనా?
2012లో మంత్రి, ఎమ్మెల్యే పదవికి రాజీనామా చేసి బీఆర్ఎస్లో చేరిన జూపల్లి కృష్ణారావు రాష్ట్ర ఏర్పాటు తరువాత కొల్లాపూర్ నుంచి గెలిచి కేసీఆర్ తొలిక్యాబినెట్లో ఐదేండ్లు మంత్రిగా కొనసాగారు. 2018లో ఓటమి తర్వాత బీఆర్ఎస్హైకమాండ్ తో పాటు బీఆర్ఎస్లో చేరిన ఎమ్మెల్యే బీరం హర్షవర్దన్రెడ్డి వర్గం నుంచి అవమానాలు భరించలేక పలుమార్లు ఆందోళనకు దిగారు. ఖమ్మం మాజీ ఎంపీ పొంగులేటి శ్రీనివాస్రెడ్డితో జతకట్టి కాంగ్రెస్లో చేరేందుకు సిద్ధమయ్యారు. కొల్లాపూర్లో మొదటి సమావేశం నిర్వహించిన జూపల్లి, వనపర్తిలో పొంగులేటి శ్రీనివాస్రెడ్డితో కలిసి మరో సభ నిర్వహించారు. ఉమ్మడి జిల్లాలో తనకు నాలుగు స్థానాలు కేటాయించాలని డిమాండ్ పెట్టినట్లు సమాచారం. కొల్లాపూర్, నాగర్కర్నూల్, వనపర్తి, గద్వాల లేదా అలంపూర్ స్థానాలు తాను సూచించిన వారికి ఇవ్వాలని పట్టుబడుతున్నట్లు తెలుస్తోంది.
ALSO READ:ఈ వారం ఎలక్షన్ కమిటీ.. వచ్చే నెల టికెట్ల ఖరారు : కాంగ్రెస్ ఎంపీ కోమటి రెడ్డి
నాగర్కర్నూల్లో మాజీ మంత్రి డా.నాగం జనార్దన్ రెడ్డి, వనపర్తిలో మాజీ మంత్రి డా.చిన్నారెడ్డి రేస్లో ఉన్నారు. ఇదిలాఉంటే నెల రోజులుగా బీఆర్ఎస్ అసంతృప్త నేత, ఎమ్మెల్సీ కూచుకుళ్ల దామోదర్రెడ్డితో సంప్రదింపులు జరిపారు. ఎటువంటి హామీ లేకుండా కాంగ్రెస్లో చేరడమా లేక బీఆర్ఎస్లోనే కొనసాగడమా అని కూచుకుళ్ల డైలమాలో పడినట్లు సమాచారం. కాంగ్రెస్ నేతలతో సంప్రదింపులు జరుపుతూనే ఈనెల 12న గద్వాల పర్యటనకు వచ్చిన సీఎం సభలో పాల్గొనడం చర్చనీయాంశంగా మారింది. సోమవారం ఢిల్లీలో ఏఐసీసీ ప్రెసిడెంట్ ఖర్గే, రాహూల్గాంధీతో జరిగిన భేటీలో ఆయన కొడుకు డా.రాజేశ్రెడ్డి పాల్గొన్నారు. నాగర్ కర్నూల్, కొల్లాపూర్లో పాత కాపులే పోటీకి సిద్ధంగా ఉన్నట్లు ప్రకటించారు. కొత్త, పాత నేతలు కలిసి పని చేస్తారనేది అనుమానమేనని
అంటున్నారు.
