బెంగళూరు: ఎన్నికల హామీలను అమలు చేయడానికి ఎస్సీ ఎస్టీ సబ్ ప్లాన్ నిధులు వాడడమంటే దళితులను మోసం చేయడమేనని కర్నాటక సర్కారుపై మాజీ సీఎం బసవరాజ్ బొమ్మై విమర్శలు గుప్పించారు. ఐదు గ్యారెంటీ స్కీమ్ల కోసం ఇప్పటికే విడుదల చేసిన నిధులను వెంటనే వాపస్ తీసుకోవాలని, లేదంటే ఎస్సీ, ఎస్టీల తరఫున రాష్ట్రవ్యాప్తంగా ఆందోళనలు చేపడతామని ప్రభుత్వాన్ని హెచ్చరించారు. ఈమేరకు శుక్రవారం బెంగళూరులోని ఫ్రీడం పార్క్లో ఏర్పాటు చేసిన నిరసన కార్యక్రమంలో బొమ్మై మాట్లాడుతూ.. ఎన్నికల సమయంలో హామీ ఇచ్చిన ఐదు గ్యారెంటీ స్కీమ్ల అమలు కు ఎస్సీ, ఎస్టీ సబ్ప్లాన్ నిధులు రూ.34,294 కోట్ల నుంచి రూ.11,144 కోట్లను ప్రభుత్వం మళ్లించిందని చెప్పారు. హామీల పేరుతో కాంగ్రెస్ ప్రభుత్వం రాష్ట్రాన్ని దివాళా తీయిస్తోందని మండిపడ్డారు.
