హైదరాబాద్: టీఆర్ఎస్ ప్రభుత్వ మాటలకు చేతలకు పొంతన లేకుండా పోయిందని బీజేపీ ఎమ్మెల్యే ఈటల రాజేందర్ విమర్శించారు. సోమాజిగూడ ప్రెస్ క్లబ్లో తెలంగాణ తహశీల్దార్ అసోసియేషన్ డైరీ, క్యాలెండర్ను ఆయన ఆవిష్కరించారు. ఈ సందర్భంగా మాట్లాడిన ఆయన.. కేసీఆర్ తీరుతో రాష్ట్రం 25 ఏళ్లు వెనక్కిపోయిందని ఆరోపించారు. గతంలో డైరీ ఆవిష్కరణ కార్యక్రమాలు కోలాహలంగా జరిగేవని.. ప్రస్తుతం ఉద్యోగులు మీటింగ్ పెట్టుకోవాలన్నా భయపడే పరిస్థితి తలెత్తిందని మండిపడ్డారు. రెవెన్యూ డిపార్ట్మెంట్ను కేసీఆర్ రాచి రంపాన పెట్టారని ఆ శాఖ ఉద్యోగుల్ని సమాజంలో దోషులుగా నిలబెట్టారని ఈటల ఆవేదన వ్యక్తం చేశారు. కేసీఆర్ కారణంగా ప్రస్తుతం రెవెన్యూ డిపార్ట్ మెంట్ అనాథలా మారిదని అన్నారు. కేసీఆర్ పిచ్చి నిర్ణయాలకు ప్రజలు త్వరలోనే చరమగీతం పాడతారని హెచ్చరించారు.
