చేగుంట(నాగర్ కర్నూల్), వెలుగు: చేతబడి చేశారన్న అనుమానంతో ఓ వృద్దుడి మెడలో చెప్పులు వేసి కమ్యూనిటీ హాల్లో బంధించడానికి ప్రయత్నించిన ఘటన ఆలస్యంగా వెలుగులోకి వచ్చింది. వివరాలిలా ఉన్నాయి.. తిమ్మాజీపేట మండలం చేగుంట గ్రామానికి చెందిన ఓ వ్యక్తి అనారోగ్యం పాలయ్యాడు. అతడికి వరుసకు బంధువయ్యే గడ్డం కృష్ణయ్య(80) తాను బాగు చేయిస్తానని మాటిచ్చాడు. ఆ తరువాత ఆయన పట్టించుకోకపోవడంతో అనారోగ్యానికి గురైన వ్యక్తి బిజినేపల్లిలో గద్దె చెప్పించుకున్నాడు.
అక్కడ గ్రామానికి చెందిన ఓ వ్యక్తి చేతబడి చేశాడని చెప్పడంతో, కృష్ణయ్యపై అనుమానం పెంచుకున్నాడు. రెండు, మూడు రోజులుగా కృష్ణయ్య గ్రామంలో లేకపోవడంతో చుట్టుపక్కల వెతికారు. శనివారం సాయంత్రం తిమ్మాజీపేట సమీపంలో కనిపించడంతో గ్రామానికి తీసుకువచ్చి కృష్ణయ్య మెడలో ఎడమ కాలి చెప్పులు వేసి కమ్యూనిటీ హాల్లో బంధించడానికి యత్నిచంగా కుల పెద్దలు జోక్యం చేసుకొని విడిపించినట్లు సమాచారం. ఈ ఘటనపై ఎలాంటి ఫిర్యాదు అందలేదని తిమ్మాజీపేట ఎస్సై హరిప్రసాద్ రెడ్డి తెలిపారు.
