వాషింగ్టన్ డీసీ: ప్రపంచాన్ని 150 సార్లు పేల్చగల సామర్థ్యం అమెరికా దగ్గర ఉందని అమెరికా అధ్యక్షుడు ట్రంప్ చెప్పారు. వైట్ హౌస్లో మీడియాతో అణ్వాయుధ నిరాయుధీ కరణపై మాట్లాడుతూనే ప్రపంచాన్ని 150 సార్లు పేల్చగల శక్తి అమెరికా సొంతమని పేర్కొన్నారు. అణు సామర్థ్యాల్లో అమెరికాలో మొదటి స్థానంలో ఉంటుందని.. రష్యా, చైనా తర్వాతస్థానాల్లో ఉంటాయని చెప్పారు. అణు నిరాయుధీకరణ గొప్ప విషయం అని అనుకుంటున్నానని అన్నారు. ఇదే విషయంపై ఇప్పటికే పుతిన్, జిన్పింగ్తో చర్చించినట్లు వెల్లడించారు.
ప్రతి ఒక్కరూ అణ్వాయుధాలకు ఖర్చు పెట్టే డబ్బుంతా ఇతర విషయాలపై ఖర్చు చేయాలనుకుంటున్నారని పేర్కొన్నారు. ప్రపంచ వ్యాప్తంగా తాను శాంతిని కోరుకుంటున్నట్లు ట్రంప్ స్పష్టం చేశారు. ఇటీవల ఎయిర్ ఫోర్స్ వన్లో ట్రంప్ మాట్లాడుతూ.. త్వరలో అమెరికా కూడా అణు పరీక్షలు చేయబోతుందని తెలిపారు. ఇతర దేశాలు చేస్తున్నప్పుడు.. తామెందుకు చేయకూడదన్నారు. పాకిస్తాన్ కూడా అణు పరీక్షలు చేయబోతుందని స్పష్టం చేశారు. తాము బహిరంగంగా చేస్తాం.. రష్యా, చైనా రహస్యంగా చేస్తాయని చెప్పిన విషయం తెలిసిందే.
