మల్కాజిగిరి, వెలుగు: రైతులను మోసం చేస్తున్న అంతర్రాష్ట్ర నకిలీ విత్తన ముఠా గుట్టును మల్కాజిగిరి ఎస్ఓటీ, శామీర్పేట పోలీసులు కలిసి రట్టు చేశారు. ఏపీలోని గుంటూరు జిల్లాకు చెందిన దాసరి శ్రీనివాసరావు (58).. మదనపల్లికి చెందిన శ్రీనివాస్ రావు వద్ద తక్కువ ధరకు ప్రభుత్వం నిషేధించిన బీటీ-3 పత్తి విత్తనాలను సేకరించాడు.
వీటిని హైదరాబాద్ పరిసరాల్లోని రైతులకు అధిక ధరలకు విక్రయించేందుకు ప్లాన్ వేశాడు. పక్కా సమాచారంతో శామీర్పేట ఓఆర్ఆర్ ఎగ్జిట్-7 వద్ద మాటువేసిన పోలీసులు.. నిందితుడు శ్రీనివాసరావును అదుపులోకి తీసుకుని అతని వద్ద ఉన్న రెండు గోనె సంచుల్లోని 100 కిలోల నిషేధిత విత్తనాలను స్వాధీనం చేసుకున్నారు.
