- షార్ట్ సర్క్యూట్తో ఫ్లాట్లో అగ్ని ప్రమాదం
- భయంతో బయటకు పరుగులు తీసిన అపార్ట్మెంట్ వాసులు
- మణికొండలోని కులీ కుతుబ్ షా కాలనీలో ఘటన
గండిపేట, వెలుగు : మణికొండలోని ఓ అపార్ట్ మెంట్ ఫ్లాట్లో షార్ట్ సర్య్కూట్ కారణంగా అగ్ని ప్రమాదం జరిగింది. స్థానికులు తెలిపిన వివరాల ప్రకారం.. మణికొండలోని కులీ కుతుబ్ షా కాలనీలో శ్రీనివాస అపార్ట్మెంట్ ఐదో ఫ్లోర్లో సివిల్ ఇంజనీర్ సురేశ్తన ఫ్యామిలీతో కలిసి ఉంటున్నాడు. సాయంత్రం పిల్లలను స్కూల్ నుంచి ఇంటికి తీసుకొచ్చేందుకు సురేశ్ భార్య ఫ్లాట్కు లాక్ వేసుకుని వెళ్లింది. కొద్దిసేపటికే ఫ్లాట్లో నుంచి ఒక్కసారిగా మంటలు చెలరేగాయి. అపార్ట్ మెంట్ లోని 54 ఫ్లాట్లలో ఉంటున్న వారు భయంతో బయటికి పరుగులు తీశారు.
స్థానికులు ఫైర్ సిబ్బందికి సమాచారం ఇచ్చారు. నాగులపల్లి, మాదాపూర్ నుంచి ఫైర్ సిబ్బంది అక్కడికి చేరుకుని 2 గంటల పాటు శ్రమించి మంటలను అదుపులోకి తెచ్చారు. ప్రమాదంలో సురేశ్ ఫ్లాట్లోని సామగ్రి కాలిపోయింది. ప్రమాదం జరిగిన సమయంలో ఇంట్లో ఎవరూ లేకపోవడంతో ప్రాణనష్టం జరగలేదు. అగ్ని ప్రమాదానికి షార్ట్ సర్క్యూట్ కారణమై ఉండొచ్చని రంగారెడ్డి జిల్లా ఫైర్ ఆఫీసర్ శ్రీధర్ రెడ్డి తెలిపారు.