హైదరాబాద్, వెలుగు: రాష్ట్రంలో నాలుగు రోజుల పాటు తేలికపాటి నుంచి మోస్తరు వర్షాలు కురుస్తాయని వాతావరణ శాఖ తెలిపింది. మొదటి రెండు రోజుల పాటు దక్షిణ తెలంగాణలోని అన్ని జిల్లాల్లో తేలికపాటి వానలు పడతాయని, ఆ తర్వాతి రెండు రోజులు రాష్ట్రవ్యాప్తంగా మోస్తరు వర్షాలు పడే చాన్స్ ఉందని పేర్కొంది. మరోవైపు టెంపరేచర్లు కూడా భారీ స్థాయిలో నమోదవుతున్నాయి. శుక్రవారం నల్గొండ జిల్లా దామరచర్ల, కరీంనగర్ జిల్లా వీణవంకలో అత్యధికంగా 45.4 డిగ్రీల ఉష్ణోగ్రత నమోదైంది. అయితే, వర్షాల ప్రభావంతో రెండు రోజుల పాటు ఉష్ణోగ్రతలు కాస్తంత తగ్గే అవకాశం ఉందని వాతావరణ శాఖ వెల్లడించింది.
