పిజ్జా, బర్గర్, సమోస, పావ్ బాజీ... ఇలా చెప్పుకుంటూ పోతే జంక్ ఫుడ్స్ లిస్ట్ పెద్దదే. అయితే చిన్నపిల్లల నుంచి పెద్దవాళ్ల వరకు అందరూ ఎంతో ఇష్టంగా తినేది మాత్రం ఫ్రెంచ్ ఫ్రైస్. ఎంత తిన్నా లెక్కే ఉండదు. కానీ, ఒక దగ్గర మాత్రం ఈ ఫ్రెంచ్ ఫ్రైస్ తినాలంటే మాత్రం డేర్ చేయాల్సిందేనట. ఎందుకంటారా?
న్యూయార్క్లోని సెరెండిపిటీ రెస్టారెంట్లో ఫ్రెంచ్ ఫ్రైస్ తినాలంటే కాస్త ఎక్కువే ఖర్చవుతుంది. ఎందుకంటే అక్కడ ఫ్రెంచ్ ఫ్రైస్ ఎంతో తెలుసా... అక్షరాలా రెండు వందల డాలర్లు. అంటే మన కరెన్సీలో పదిహేను వేల రూపాయలు. మామూలుగా అయితే ఏ రెస్టారెంట్లో అయినా ఇంత రేటు ఉండదు. మరి ఇక్కడెందుకు ఈ రేటు? వీటినేమైనా బంగారంతో తయారు చేస్తారా? అంటే... అవును. వీటి తయారీలో బంగారాన్ని వాడతారు. అందుకే ఇవి మామూలు ఫ్రెంచ్ ఫ్రైస్ కాదు. వీటి తయారీ చివర్లో బంగారు రేకుల్ని చల్లుతారు. అందుకని వీటి రేటు ఇలా పెంచారన్నమాట. ఇదేదో వైరల్ వీడియో కోసం చేశారనుకుంటే పొరపాటు. ఫ్రెంచ్ ఫ్రైస్ బంగారు రేకుల్ని వాడినందుకు గానూ ఇది ప్రపంచంలోనే ‘మోస్ట్ ఎక్స్పెన్సివ్ ఫ్రెంచ్ ఫ్రైస్’గా గిన్నిస్ వరల్డ్ బుక్లో చోటు దక్కింది. ఫ్రెంచ్ ఫ్రైస్ తయారీ, గిన్నిస్ రికార్డు అందుకున్న వీడియోని గిన్నిస్ రికార్డ్ అఫీషియల్ ఇన్స్టాగ్రామ్ అకౌంట్లో పోస్ట్ చేశారు.