లెజెండరీ సింగర్ ఘంటసాల వెంకటేశ్వరరావు జీవితం ఆధారంగా రూపొందిన బయోపిక్ ‘ఘంటసాల ది గ్రేట్’. సింగర్ కృష్ణ చైతన్య టైటిల్ రోల్ చేశాడు. ఘంటసాల భార్య సావిత్రి పాత్రలో కృష్ణ చైతన్య భార్య మృదుల నటించారు. సిహెచ్ రామారావు దర్శకత్వంలో సిహెచ్ శ్రీమతి ఫణి నిర్మించారు. డిసెంబర్ 12న సినిమా విడుదల కానుంది. తాజాగా ప్రీ రిలీజ్ ఈవెంట్ను నిర్వహించారు.
నిర్మాతలు చదలవాడ శ్రీనివాసరావు, తమ్మారెడ్డి భరద్వాజ, తుమ్మలపల్లి రామ సత్యనారాయణ, రేలంగి నరసింహారావు, నటుడు తనికెళ్ల భరణి, రచయితలు జేకే భారవి, అనంత శ్రీరామ్ ఈ కార్యక్రమానికి హాజరై ఘంటసాల గొప్పతనాన్ని, తెలుగు చిత్ర పరిశ్రమకు ఆయన చేసిన సేవలను గుర్తు చేస్తూ.. ఈ సినిమా గొప్ప విజయం సాధించాలని కోరారు.
ఈ సందర్భంగా కృష్ణ చైతన్య మాట్లాడుతూ ‘ఈ చిత్రంలో ఘంటసాల గారి పాత్రను పోషించడం అదృష్టంగా భావిస్తున్నా. ఆయన పాటలు వింటూ పెరిగిన నేను ఆయన జీవిత చరిత్రను చెప్పే క్రమంలో భాగమైనందుకు సంతోషంగా ఉంది’ అని చెప్పాడు. దర్శకుడు రామారావు మాట్లాడుతూ ‘సింగర్గా కంటే ఘంటసాల వ్యక్తిత్వం గురించి అందరికీ తెలియాలనే ఈ సినిమాను రూపొందించా. భారతదేశ చరిత్రలోనే ఒక గాయకుడి బయోపిక్ రావడం ఇదే ప్రధమం’ అని అన్నారు.
