పణజి: జైలు నుంచి ఓ గ్యాంగ్స్టర్ విడుదలయ్యాడు.. దీంతో గ్యాంగ్స్టర్ అనుచరులు జైలు వద్దే సంబరాలు జరుపుకున్నారు. డ్యాన్సులు చేస్తూ తమ లీడర్ను ఊరేగింపుగా తీసుకెళ్లారు. ఈ సంబరాల్లో జైలు వార్డెన్ కూడా పాల్గొన్నాడు. గోవా సెంట్రల్ జైలు ముందు చోటుచేసుకుందీ ఘటన. గ్యాంగ్స్టర్ అమోఘ్ నాయక్ జైలు ప్రధాన గేట్ నుంచి బయటకు రావడంతోనే అనుచరులు చుట్టుముట్టి నినాదాలు చేస్తూ , పటాకులు కాలుస్తూ సెలబ్రేట్ చేసుకున్నారు.
ఈ సంబరాల్లో వార్డెన్ లక్ష్మన్ పడ్లోస్కర్ గ్యాంగ్స్టర్ అనుచరులపై లిక్కర్ చల్లడం, తర్వాత గ్యాంగ్స్టర్ అమోఘ్ నాయక్ భుజాలపై ఫొటోలకు ఫోజులిస్తున్న వీడియో ఒకటి సోషల్ మీడియాలో వైరల్గా మారింది. దీంతో వార్డెన్ లక్ష్మణ్పై విమర్శలు వెల్లువెత్తాయి. సంబరాల వీడియో ఉన్నతాధికారులకు చేరడంతో విచారణకు ఆదేశించారు. ప్రాథమిక దర్యాఫ్తులో ఆ సంబరాలు నిజమేనని తేలడంతో వార్డెన్ లక్ష్మన్ పడ్లోస్కర్ను సస్పెండ్ చేశారు.
