- మంత్రి సబిత ప్రారంభించి 20 రోజులైతున్నా క్లాసులు చెప్పట్లే
- ఓయూ, పాలమూరు తప్ప మిగతా వర్సిటీల్లో షురూ కాలే
- శాతవాహనలో వారానికి రెండు రోజులే క్లాసులు
- సమ్మర్ హాలిడేస్ అంటూ వర్సిటీల హాస్టళ్లకు తాళం
హైదరాబాద్, వెలుగు: యూనివర్సిటీల్లో జాబ్లకు ప్రిపేర్ అవుతున్న అభ్యర్థులకు సర్కార్ కోచింగ్ ఇంకా పూర్తి స్థాయిలో మొదలు కాలేదు. గ్రూప్ 1, ఎస్సై, కానిస్టేబుల్ పోస్టులకు నోటిఫికేషన్ విడుదలై రెండు వారాలు గడస్తున్నా చాలా వర్సిటీల్లో క్లాసులను మొదలు పెట్టలేదు. పోటీ పరీక్షల కోసం ఏప్రిల్ 20న విద్యాశాఖ మంత్రి సబితా ఇంద్రారెడ్డి యూనివర్సిటీల్లో ఫ్రీ కోచింగ్ను స్టార్ట్ చేసినా.. ఉస్మానియా, పాలమూరు యూనివర్సిటీలు మినహా ఎక్కడా పూర్తి స్థాయిలో క్లాసులు జరగట్లేదు. సెమిస్టర్ ఎగ్జామ్స్, వేసవి సెలవుల పేరుతో ఆయా వర్సిటీల్లో క్లాసును బంద్పెట్టారు. శాతవాహన వర్సిటీలో వారంలో రెండు రోజులే (శని, ఆదివారాలు) క్లాసులు నిర్వహిస్తున్నారు. కాకతీయ, తెలంగాణ, పాలమూరు, మహాత్మాగాంధీ వర్సిటీల్లో క్లాసులు మొదలవ్వనే లేదు. అసలు క్లాసులు పెట్టడం లేదని, ఒకవేళ పెట్టినా ఒకట్రెండు రోజులే నిర్వహిస్తుండటంతో సిలబస్ ఎలా పూర్తి చేస్తారని అభ్యర్థులు ప్రశ్నిస్తున్నారు.
ఫుల్ డిమాండ్
జాబ్స్కు వరుసగా నోటిఫికేషన్లు వస్తుండడంతో విద్యార్థులంతా చాలా సీరియస్గానే ప్రిపేర్ అవుతున్నారు. కొందరైతే పీజీ పూర్తయినా ప్రిపరేషన్ కోసమే మరో పీజీకి అడ్మిషన్ తీసుకుంటున్నారు. వర్సిటీ ప్రొఫెసర్లే సబ్జెక్టులను బోధిస్తుండడంతో కోచింగ్కు వెళ్లేందుకు చాలా మంది ఇంట్రెస్ట్ చూపిస్తున్నారు. ఓయూలో క్లాస్ రూమ్ మొత్తం నిండిపోవడంతో ప్రత్యేకంగా ఇంకో సెక్షన్నే ఓపెన్ చేశారంటేనే వర్సిటీల్లో కోచింగ్ క్లాసులకు ఎంత డిమాండ్ ఉందో అర్థం చేసుకోవచ్చు. అయితే, చాలా యూనివర్సిటీలు మాత్రం వేసవి సెలవుల పేరు చెప్పి హాస్టళ్లను మూసేశాయి. వాస్తవానికి ఎండా కాలం సెలవుల్లో యూనివర్సిటీల మెస్లను బంద్పెట్టినా హాస్టల్ రూములను మాత్రం ఓపెన్ చేసే ఉంచేటోళ్లు. దీంతో స్టూడెంట్లు హాస్టల్ రూముల్లోనే వండుకోవడమో లేదంటే బయట తినడమో చేసేవారు. కానీ, గతంలో ఎన్నడూ లేనివిధంగా ఇప్పుడు పూర్తిగా హాస్టళ్లనే మూసేస్తూ వీసీలు సర్క్యులర్ జారీ చేశారు. హాస్టళ్లను వెంటనే ఖాళీ చేయాలని, ఆన్లైన్లో కోచింగ్ క్లాసులు వినాలంటూ కేయూ వీసీ ఉత్తర్వులిచ్చారు. విద్యార్థులు ఆందోళన చేయడంతో ఈనెల 24 వరకు హాస్టళ్లుంటాయని ప్రకటించారు. మరి, ఆ తర్వాత తమ పరిస్థితేంటని విద్యార్థులు ప్రశ్నిస్తున్నారు. నిజామాబాద్లోని తెలంగాణ వర్సిటీకి ఈ నెల 10 నుంచి సమ్మర్ హాలీడేస్ ఇవ్వడంతో స్టూడెంట్లు ఇంటి
బాట పట్టారు.
కోచింగ్ తీసుకునే స్థోమత లేదు
నేను గ్రూప్స్కు ప్రిపేర్ అవుతున్నా. ప్రైవేటులో కోచింగ్ తీసుకునే స్థోమత నాకు లేదు. యూనివర్సిటీలో కోచింగ్ ఇస్తున్నారంటే సంతోషించా. కానీ ఇప్పటి వరకు క్లాసులే మొదలుపెట్టలేదు. మా లాంటోళ్లను దృష్టిలో పెట్టుకుని ఇప్పటికైనా కోచింగ్ ప్రారంభించాలి.
- కామగోని శ్రవణ్, ఎంసీజే, కేయూ