వరదలతో ప్రజలు అల్లాడుతున్నరు: మల్లు రవి
హైదరాబాద్, వెలుగు: వర్షాలు, వరదలతో సిటీల్లోని ప్రజలు అల్లాడుతున్నా.. సహాయ చర్యలు చేయడంలో ప్రభుత్వం విఫలమైందని పీసీసీ సీనియర్ వైస్ ప్రెసిడెంట్ మల్లు రవి విమర్శించారు. కనీసం పునరావాస కేంద్రాలనూ ఏర్పాటు చేయడం లేదన్నారు. శుక్రవారం ఆయన గాంధీభవన్లో మీడియాతో మాట్లాడారు. ఇండ్లలోకి వరద నీళ్లతోపాటు పాములు వస్తున్నాయని, వరద నీరు వెళ్లిపోయేలా డ్రైనేజీ వ్యవస్థను ఏర్పాటు చేస్తే బాగుంటుందన్నారు. వరదల వల్ల ప్రజలకు తాగునీరు కూడా దొరకని పరిస్థితి ఏర్పడిందన్నారు.
సెక్రటేరియెట్, ప్రగతిభవన్ వంటి బిల్డింగ్లు నిర్మించినంత మాత్రాన అది బంగారు తెలంగాణ కాలేదన్నారు. గతంలో హైదరాబాద్లో వరదలు వచ్చినప్పుడు రూ.10 వేల ఆర్థిక సాయం ప్రకటించారని, ఇప్పుడు మాత్రం ఎలాంటి ప్రకటనా చేయడం లేదని ఫైర్ అయ్యారు. పీసీసీ చీఫ్ రేవంత్ రెడ్డి ఆదేశాల మేరకు కాంగ్రెస్ శ్రేణులు సహాయ కార్యక్రమాల్లో పాల్గొంటున్నాయన్నారు. కాంగ్రెస్ పార్టీ ఆధ్వర్యంలో ఫ్లడ్ రిలీఫ్ కమిటీని ఏర్పాటు చేశామని చెప్పారు.
