పంచాయతీలు, పరిషత్లు, మున్సిపాలిటీల్లో అడిషనల్ కలెక్టర్లదే పెత్తనం?
సర్పంచ్లు, చైర్పర్సన్లు, మేయర్లపై వేటుకు సిఫారసు చేసే పవర్ కూడా వీరికే!
ఇప్పటికే 14 జిల్లాలకు నియామకం..
త్వరలో మిగతా జిల్లాలకు
విధులు, బాధ్యతలపై నేడు
కలెక్టర్ల మీటింగ్లో సీఎం వెల్లడించే చాన్స్
పాలన వ్యవహారాల్లో వేగంగా మార్పులు
గ్రామ పంచాయతీలు, మండల పరిషత్లు, జిల్లా పరిషత్లు, మున్సిపాలిటీలు, కార్పొరేషన్లు.. ఇలా అన్ని లోకల్ బాడీస్ను రాష్ట్ర ప్రభుత్వం తన పిడికిట్లోకి తీసుకోనుంది. ఇందుకోసం పాలన వ్యవహారాల్లో వేగంగా మార్పులు చేస్తోంది. సర్పంచ్లు, మండల పరిషత్ చైర్పర్సన్లు, జడ్పీ చైర్పర్సన్లు, మున్సిపల్ చైర్పర్సన్లు, మేయర్ల పనితీరును బేరీజు వేసేందుకు జిల్లా స్థాయిలో లోకల్బాడీస్ కోసం అడిషనల్ కలెక్టర్ పోస్టును క్రియేట్చేసింది. 14 జిల్లాలకు వీరిని నియమిస్తూ ఆదివారం రాత్రి ఉత్తర్వులు జారీ చేసింది. త్వరలో మిగతా జిల్లాల్లో కూడా నియమించనుంది. ఇకపై ఈ అడిషనల్ కలెక్టర్ల కనుసన్నల్లోనే లోకల్ బాడీస్ పని చేయాల్సి ఉంటుంది. కొత్త పంచాయతీ రాజ్ చట్టం, కొత్త మున్సిపల్ చట్టం ప్రకారం సర్పంచ్, మండల పరిషత్ చైర్పర్సన్, జడ్పీ చైర్పర్సన్, మున్సిపల్ చైర్పర్సన్, మేయర్ పని చేస్తున్నారా? లేదా? అనేది వీళ్లే ప్రభుత్వానికి రిపోర్టు చేయనున్నట్లు తెలిసింది. పని తీరు సరిగా లేని ప్రజాప్రతినిధులపై వేటు వేయాలని సిఫారసు చేసే అధికారం కూడా వీరికే ఉండనున్నట్లు అధికార వర్గాలు అంటున్నాయి. గ్రేటర్ హైదరాబాద్ మాత్రం మున్సిపల్ శాఖ కమిషనర్ పర్యవేక్షణలో ఉంటుంది.
విధులు, బాధ్యతలు లేకుండా పోస్టు
అడిషనల్ కలెక్టర్ల పోస్టును రాష్ట్ర ప్రభుత్వం ఆకస్మికంగా క్రియేట్ చేసింది. ఐఏఎస్ ల బదిలీల సందర్భంగా ఆదివారం రాత్రి ఈ ఉత్తర్వులు జారీ చేసింది. కానీ.. అడిషనల్ కలెక్టర్ల బాధ్యతలేమిటి? వీరి విధులేమిటి? అనే దానిపై స్పష్టత ఇవ్వలేదు. సర్వీస్ రూల్స్ విడుదల చేయలేదు. సాధారణంగా కొత్త పోస్టును ఏర్పాటు చేసినప్పుడు ఆ పోస్టులో ఉండే అధికారి బాధ్యతలు, విధులపై సర్వీస్ రూల్స్ విడుదల చేయాల్సి ఉంటుంది. తామేం చేయాలో తెలియదని, పోస్టింగ్ ఉత్తర్వులే వచ్చాయని ట్రాన్స్ఫర్ ఆర్డర్ చూసిన ఓ ఆఫీసర్ అన్నారు. మంగళవారం ప్రగతిభవన్ లో జరిగే కలెక్టర్ల సదస్సులో సీఎం కేసీఆర్ అడిషనల్ కలెక్టర్ల బాధ్యతలపై దిశానిర్దేశం చేయనున్నట్లు తెలిసింది.
ఒకే అధికారి చేతిలోకి జిల్లా లోకల్ బాడీస్
జిల్లా స్థాయిలోని లోకల్ బాడీస్ బాధ్యతలు మొత్తం అడిషనల్ కలెక్టర్ చేతిలోకి రానున్నాయి. ఆయన పర్యవేక్షణలోనే గ్రామ పంచాయతీ, మండల పరిషత్, జిల్లా పరిషత్, మున్సిపాలిటీ, మున్సిపల్ కార్పొరేషన్ పని చేయాల్సి ఉంటుంది. నిధుల వినియోగం, విధుల నిర్వహణపై అడిషనల్ కలెక్టర్ మానిటరింగ్ ఉంటుందని ఓ ఉన్నతాధికారి చెప్పారు. ఇప్పటివరకు పంచాయతీలు జిల్లా పంచాయతీ అధికారి పర్యవేక్షణలో ఉండేవి. మండల పరిషత్, జిల్లా పరిషత్లు జడ్పీ సీఈవో మానిటర్ చేసేవారు. వీరిద్దరూ జిల్లా కలెక్టర్కు రిపోర్ట్ చేసేవారు. మున్సిపాలిటీలు, కార్పొరేషన్ల కమిషనర్లు కలెక్టర్కు సంబంధం లేకుండా నేరుగా కమిషనర్ అండ్ డైరెక్టర్ మున్సిపల్ అడ్మినిస్ట్రేషన్ (సీడీఎంఏ)కు నివేదించేవారు. స్థానిక సంస్థలకు ఒక్కో జిల్లా అధికారి ఇన్చార్జ్గా ఉండటంతో పాలన పరమైన నిర్ణయాలు వెంటనే అమలు చేయడం కష్టంగా మారిందనే అభిప్రాయం ప్రభుత్వ వర్గాల్లో ఉంది. అందుకని జిల్లాలోని లోకల్ బాడీస్ పర్యవేక్షణను ఒకే అధికారి పరిధిలో ఉంచితే.. ఈ జాప్యం ఉండదని ప్రభుత్వం భావిస్తోంది. ఈ క్రమంలోనే స్పెషల్గా లోకల్ బాడీస్ కోసం అడిషనల్ కలెక్టర్లను నియమించిందని ఓ అధికారి చెప్పారు.
పల్లె, పట్టణ ప్రగతిపై ఫోకస్
ప్రతి నెలా పల్లె ప్రగతి, పట్టణ ప్రగతి ప్రోగ్రాంలపై ప్రత్యేక దృష్టి పెడుతామని సీఎం కేసీఆర్ ఇప్పటికే ప్రకటించారు. పారిశుధ్యం, పచ్చదనం ప్రధాన ఎజెండాగా ఉండే ఈ కార్యక్రమం అనుకున్నట్టుగా జరిగేలా అడిషనల్ కలెక్టర్లు (లోకల్ బాడీస్) పర్యవేక్షించనున్నట్లు తెలిసింది. నిధుల దుర్వినియోగం, విధుల్లో నిర్లక్ష్యం వహించే లోకల్ బాడీస్ ప్రజాప్రతినిధులపై చర్యలు తీసుకోవాలని సిఫారసు చేసే బాధ్యతను వారికే అప్పగించే అవకాశం ఉన్నట్లు తెలిసింది.
రెవెన్యూ ప్రక్షాళన షురూ?
రెవెన్యూ శాఖలో విపరీతమైన అవినీతి ఉందని, ప్రక్షాళన చేయాల్సిన అవసరం ఉందని సీఎం కేసీఆర్ఇటీవల పలుమార్లు చెప్తూ వచ్చారు. త్వరలో జరగనున్న అసెంబ్లీ బడ్జెట్ సమావేశాల్లో కొత్త రెవెన్యూ చట్టాన్ని ప్రవేశపెట్టేందుకు రాష్ట్ర ప్రభుత్వం కసరత్తు చేస్తోంది. ఆ చట్టంలో ఎంఆర్వో, వీఆర్వోల అధికారాలకు కత్తెర వేయనున్నారు. ఇన్నాళ్లూ ఉన్న జాయింట్ కలెక్టర్ పోస్టును అడిషనల్ కలెక్టర్ గా మార్చటం అందులో భాగమేనని ప్రభుత్వ వర్గాలు చెప్తున్నాయి. ఇప్పటివరకు జిల్లాల్లో భూమికి సంబంధించిన అంశాలను నేరుగా జాయింట్ కలెక్టర్ మానిటరింగ్ చేసేవారు. ఇప్పట్నుంచి ఆ బాధ్యతలను అడిషనల్ కలెక్టర్ నిర్వహిస్తారు. ఆర్డీవోలు, డీఆర్వోలు ఈయన డైరెక్షన్లో పనిచేస్తారు.
