హైదరాబాద్, వెలుగు: రాష్ట్రంలోని ఇంజనీరింగ్ కాలేజీల్లో ఫీజుల పెంపునకు సర్కారు బ్రేక్ వేసింది. ఈ ఏడాది పాత ఫీజులతోనే కౌన్సెలింగ్ నిర్వహించాలని డిసైడ్ అయింది. బుధవారం తెలంగాణ అడ్మిషన్ అండ్ ఫీ రెగ్యులేటరీ కమిటీ (టీఏఎఫ్ఆర్సీ) సమావేశమైంది. దీనిలో రాష్ట్రవ్యాప్తంగా ఉన్న ప్రైవేటు ఇంజనీరింగ్ కాలేజీల్లో ఫీజుల పెంపుపై చర్చించారు. రానున్న 2025–27 మూడేండ్ల బ్లాక్ పీరియెడ్కు ఫీజులను నిర్ణయించాల్సి ఉంది.
అయితే, టీఏఎఫ్ఆర్సీ అధికారులు సక్రమంగా ఫీజుల ప్రతిపాదనలు చేయకపోవడంతో, ఈ ఏడాది ఫీజుల పెంపును ఆపేయాలని డిసైడ్ అయినట్టు తెలిసింది. ఇప్పటికే అన్ని కాలేజీల్లో ఫీజుల పెంపుపై ప్రతిపాదనలు రెడీ చేయగా, దానిపై సమీక్షించేందుకు గానూ ఒక సబ్ కమిటీని ఏర్పాటు చేయాలని భావిస్తున్నారు. ఆ తర్వాతే ఫీజుల పెంపుపై నిర్ణయించాలని నిర్ణయం తీసుకున్నట్టు సమాచారం. ఇటీవల ఇంజనీరింగ్ కాలేజీల్లో ఫీజులపై సీఎం రేవంత్ రెడ్డి సమక్షంలో సమావేశం జరగ్గా, ఫీజుల పెంపు సరిగా లేదని ఆయన అధికారులపై ఆగ్రహం వ్యక్తం చేసిన విషయం తెలిసిందే.
