దసరా సెలవులు ముగించుకుని జనాలు హైదరాబాద్ బాట పట్టారు. దీంతో సిటీ వచ్చే అన్ని రూట్లు వాహనాలతో రద్దీగా మారిపోయాయి. హైదరాబాద్ సమీపంలోకి వచ్చే సరికి ట్రాఫిక్ భారీగా పెరిగి వాహనాలు నెమ్మదిగా నడుస్తున్నాయి. 2026 అక్టోబర్ 22న (గురువారం ) హైదరాబాద్‌లోని ప్రధాన హైవేలు, ఆర్టీరియల్ రోడ్లపై భారీ ట్రాఫిక్ జామ్ ఏర్పడింది.
విద్యాసంస్థలు తెరుచుకోవడానికి ముందు ప్రజలు నగరానికి చేరుకోవడంతో రోడ్లు మెల్లగా కదులుతున్నాయి.
విజయవాడ-హైదరాబాద్ నేషనల్ హైవేపై ఉదయం నుంచే మంగళ్‌పల్లి నుంచి అవుటర్ రింగ్ రోడ్ (ORR) వైపు వాహనాలు క్యూ కట్టాయి. నాగ్‌పూర్, ముంబై, వరంగల్ హైవేలపై కూడా భారీ ట్రాఫిక్ ఏర్పడింది. ఆంధ్రప్రదేశ్, తెలంగాణ జిల్లాల నుంచి (మెదక్, సిద్దిపేట, సంగారెడ్డి తదితర ప్రాంతాల నుంచి) తిరిగి వస్తున్న ప్రయాణికులతో రోడ్లు నిండిపోయాయి.
ఎల్‌బీ నగర్, దిల్‌సుఖ్‌నగర్ ప్రాంతాల్లో ఆర్టీసీ, ప్రైవేట్ బస్సులు, ఇతర వాహనాలు పెద్ద సంఖ్యలో చేరడంతో భారీ ట్రాఫిక్ ఏర్పడింది. దీనివల్ల ప్రయాణికులకు ఇబ్బంది కలిగింది. చాలా మంది సమయానికి గమ్యస్థానాలకు చేరుకోలేకపోయారు. పరిస్థితిని దృష్టిలో ఉంచుకుని కీలక జంక్షన్ల దగ్గర ట్రాఫిక్ పోలీసులు ట్రాఫిక్ ను నియంత్రిస్తున్నారు.
ALSO READ : డీఆర్డీఏ కార్యాలయంలో ఏసీబీ రైడ్స్.. రూ.40 లక్షల బదిలీ వ్యవహారంలో పట్టుబడిన అధికారులు
అదే సమయంలో ట్యాంక్‌బండ్, చుట్టుపక్కల ప్రాంతాల్లో దుర్గామాత విగ్రహాల నిమజ్జనంతో ట్రాఫిక్ ఏర్పడుతోంది. నిమజ్జన ఊరేగింపుల కారణంగా నగరంలోని కొన్ని ప్రాంతాల్లో ఆంక్షలు విధించారు. మహాత్మా గాంధీ బస్ స్టేషన్ (ఎంజీబీఎస్)కు వెళ్లే ప్రయాణికులను దిల్‌సుఖ్‌నగర్ దగ్గర దిగి ప్రత్యామ్నాయ ఏర్పాట్లు చేసుకోవాలని సూచించారు.
స్కూల్స్ కాలేజీలు గురువారం నుంచి తిరిగి ప్రారంభం కావడంతో అందరూ హైదరాబాద్ బాట పట్టారు. దీంతో సిటీలోని రోడ్లపై ట్రాఫిక్ పెరిగింది. నిమజ్జన ఏర్పాట్ల కోసం విధించిన ట్రాఫిక్ ఆంక్షలు కొన్ని చోట్ల ఎత్తివేసినా కొన్ని రోడ్లపై ట్రాఫిక్ ఇంకా నెమ్మదిగానే కదులుతోంది.
