అధికార పార్టీనేతల తలోదారి
హైకమాండ్ వద్దకు నేతల పంచాయితీ
పోటాపోటీగా వెళ్తున్న నాయకులు
సోషల్ మీడియాలో చక్కర్లు కొడుతున్న ఫొటోలు
ఆదిలాబాద్,వెలుగు: ఉమ్మడి జిల్లా గులాబీలో గ్రూప్ ల లొల్లి మళ్లీ మొదలైంది. లీడర్లు ఎవరికి వారు మీటింగ్లు నిర్వహిస్తున్నారు. కొందరు నాయకులు తమదంటే తమదే పెత్తనమంటున్నారు. అంతేకాదు పలువురు వేర్వేరుగా మంత్రులను కలవడం చర్చనీయాంశమైంది. అధికార పార్టీలో విభేదాలు భగ్గుమంటున్నాయి. డీసీసీబీ ఎన్నికల సమయంలో ఏర్పడ్డ మనస్పర్థాలు ఇంకా కొనసాగుతున్నాయి. ఆదిలాబాద్ లోకల్ఎమ్మెల్యే జోగు రామన్నను విస్మరించి మరోవర్గం దూసుకుపోతోంది. నూతన రెవెన్యూ చట్టాన్ని ఆహ్వానిస్తూ సోమవారం ఎమ్మెల్యే ఆధ్వర్యంలో నిర్వహించిన ఎడ్లబండ్ల ర్యాలీకి టీఆర్ఎస్లీడర్లు కొందరు డుమ్మాకొట్టారు. ఇటీవల జరిగిన కోవిడ్ రివ్యూ మీటింగ్కూడా ఎమ్మెల్యేకు తెలియకుండా మాజీ ఎంపీ నగేశ్ ఆధ్వర్యంలో నిర్వహించారు. వరుస ఘటనలతో సీరియస్గా ఉన్న జోగురామన్న అసంతృప్తి లీడర్లను కూర్చొబెట్టి మాట్లాడినట్లు తెలిసింది. ఇటీవల బోథ్ నియోజకవర్గానికి చెందిన నాయకులతో మంత్రి కేటీఆర్ ను కలిశారు. స్థానిక పరిస్థితులను మంత్రి దృష్టికి తీసుకెళ్లారు.
సోషల్ మీడియాలో హల్చల్..
ఆదిపత్య పోరు సాగుతున్న క్రమంలో వేర్వేరుగా మంత్రులను కలిసిన ఫొటోలు సోషల్ మీడియాలో చక్కర్లు కొడుతున్నాయి. దీంతో స్థానికంగా టీఆర్ఎస్లో కొనసాగుతున్న దూరం మళ్లీ చర్చనీయాంశమైంది. దీంతో నేతల మధ్య తలెత్తిన వివాదాలు చినికిచినికి గాలివానలా మారే అవకాశాలున్నాయి.
