హైదరాబాద్: ఇష్టంలేదని చెప్పినా వినలేదు. వివాహితపట్ల ఓ యువకుడు క్రూరంగా ప్రవర్తించినందుకు చివరకు ప్రాణాలమీదకు తెచ్చుకున్నాడు. ఈ సంఘటన హైదరాబాద్ లో జరిగింది.
వివరాలు: సనత్ నగర్ పోలీస్ స్టేషన్ పరిధిలోని అల్లాపూర్ కి చెందిన అజయ్ అనే యువకుడు.. మాదాపూర్ శ్రీ చైతన్య కాలేజ్ లో పని చేస్తున్నాడు. అజయ్ కి కూకట్ పల్లికి చెందిన (తనకంటే పెద్దవయసున్న) ఓ మహిళతో పరిచయం ఉంది. అదే ఆసరాగా తీసుకున్న అజయ్ .. ఆ మహిళ కూతురిని తనకు ఇచ్చి పెళ్లి చేయాలని ఆమెను టార్చర్ పెట్టాడు. ఫ్లీజ్ ఆంటీ నీ కూతురిని నేను పెళ్లి చేసుకుంటాను అంటూ సంవత్సరంగా అడుగుతున్నప్పటికీ.. ఆమె ఒప్పుకోలేదు.
అయితే ఇటీవలే ఆమె కూతురు వేరే వ్యక్తిని ప్రేమించి పెళ్లి చేసుకుంది. ఈ విషయం తెలిసిన అజయ్.. మహిళ కూతురు, ఆమె భర్తకు ఫోన్ చేస్తూ వేధించాడు. అతడిని వదిలేసి నన్ను పెళ్లి చేసుకోవాలంటూ వివాహితను బెదిరించాడు. దీంతో విసుగు చెందిన ఆ ఫ్యామిలీ..శుక్రవారం ఉదయం అజయ్ ఇంటికి వెళ్లి అతనిపై దాడి చేశారు. అజయ్ కి బలమైన గాయాలు తగలడంతో గాంధీ హాస్పిటల్ కి తరలించారు. చికిత్స పొందుతూ అజయ్ చనిపోయాడు. సమాచారం అందుకున్న పోలీసులు కేసు నమోదు చేసి దర్యాప్తు చేస్తున్నామని తెలిపారు.
