న్యూఢిల్లీ: బ్రిటన్ ప్రధానిగా రిషి సునక్ నియామకం కావడంతో మాజీ క్రికెటర్ ఆశిశ్ నెహ్రా ట్రెండింగ్ లోకి వచ్చారు. ఇద్దరూ ఒకేలా ఉండడంతో వారిపై సోషల్ మీడియాలో మీమ్స్ పేలుతున్నాయి. ఈ క్రమంలో ప్రముఖ వ్యాపారవేత్త హర్ష్ గోయెంకా చేసిన ట్వీట్ తెగ వైరల్ అవుతోంది. బ్రిటన్లో ఉన్న కోహినూర్ డైమండ్ ను తిరిగి ఇండియాకు తీసుకురావడానికి ఆయనొక ఐడియా చెప్పారు. కోహినూర్ ను తిరిగి తెచ్చేందుకు ఫ్రెండ్ ఇచ్చిన ఐడియా అంటూ దాన్ని ట్విట్టర్లో పోస్టు చేశారు.
ఆ ఐడియా ఏంటంటే.. ‘‘రిషి సునక్ను ఇండియాకు రప్పించాలి. ఆయన తన అత్తామామలను కలిసేందుకు వచ్చి బెంగళూర్ ట్రాఫిక్లో చిక్కుకున్నప్పుడు కిడ్నాప్ చేయాలి. రిషి స్థానంలో ఆశిశ్ నెహ్రాను బ్రిటన్ ప్రధానిగా పంపించాలి. ఈ తేడాను ఎవరూ గుర్తించలేరు. కోహినూర్ను వెనక్కి రప్పించే బిల్లును పాస్ చేయాలని నెహ్రాకు చెప్పాలి” అని పేర్కొన్నారు. గోయెంకా ట్వీట్పై నెటిజన్లు స్పందిస్తూ ఫన్నీ కామెంట్లు పెడుతున్నారు. ‘‘బెంగళూర్ ట్రాఫిక్లో చిక్కుకున్నప్పుడు కిడ్నాప్ చేయడం ఎందుకు? రిషి అందులో నుంచి బయటపడే లోపు నెహ్రా బ్రిటన్ వెళ్లి బిల్లు పాస్ చేసి కోహినూర్ తీసుకొని వచ్చేస్తారు” అంటూ ఓ నెటిజన్ కామెంట్ చేశారు.
