వానాకాలం వచ్చిందంటే ఎటు నుంచి వరద ముంచెత్తుతుందో తెలియక లోతట్టు ప్రాంతాల్లోని జనం వణికిపోతున్నారు. ఒకప్పుడు హైదరాబాద్ లాంటి పెద్ద నగరాలకే పరిమితమైన వరదలు, ఇప్పుడు వరంగల్, కరీంనగర్, నిజామాబాద్ లాంటి సిటీల్లోనూ కామన్ గా మరాయి. అధికారులు, ప్రజాప్రతినిధుల తీరుతో ప్లానింగ్ లేకుండా వెలుస్తున్న కాలనీలు రోజుల తరబడి నీటిలో మునిగి ఉంటున్నాయి. ఇండ్ల చుట్టూ చేరే బురద, మురుగుతో ఓ వైపు రోగాలు, మరోవైపు పురుగుపుట్రతో ఎప్పుడు ఏ ప్రమాదం ముంచుకొస్తుందో తెలియట్లేదు. ఆయా చోట్ల వరద నివారణ చర్యలు చేపట్టని ప్రభుత్వంపై నమ్మకం కోల్పోతున్న కొందరు ఇంటి ఓనర్లు తామే స్వయంగా రంగంలోకి దిగుతున్నారు. నిజామాబాద్ లోని 16 డివిజన్కు చెందిన సత్యనారాయణ, లావణ్య దంపతులు ఓ అడుగు ముందుకేసి తమ 124 గజాల ఇంటిని నాలుగు ఫీట్ల పైకి లేపారు. ఇంటర్ నెట్లో ఓ వీడియో చూసి హర్యానా నుంచి పనివాళ్లను పిలిపించామని చెప్పారు. ఇంటిని పైకి లేపేందుకు రూ.5 లక్షలు ఖర్చయిందని, 15 రోజుల టైం పట్టిందని సత్యనారాయణ తెలిపారు. ఇప్పుడు వరద వచ్చినా ఎలాంటి భయం ఉండదని, ఇది తమకు ఎంతో రిలీఫ్ అని చెప్పారు.
– వెలుగు ఫొటోగ్రాఫర్, నిజామాబాద్
