కన్నడ స్టార్ యష్ నటించిన బ్లాక్ బస్టర్ ఫిల్మ్ 'కేజీఎఫ్', 'కేజీఎఫ్ 2' ఎంత హిట్అయ్యాయో అందరికీ తెలిసిందే. ప్రశాంత్ నీల్ దర్శకత్వం వహించిన ఈ సినిమా రెండో భాగం రిలీజై రీసెంట్ గా ఏడాది పూర్తి చేసుకుంది. ఈ సందర్భంగా చిత్ర నిర్మాణ సంస్థ హోంబలే ఫిల్మ్స్ ఓ క్రేజీ అప్ డేట్ ఇచ్చింది. 'కేజీఎఫ్ 3' సినిమాకు సంబంధించిన అనౌన్స్ మెంట్ ను ఓ వీడియో ద్వారా తెలియజేసింది. “అత్యంత శక్తిమంతుడైన వ్యక్తి నిలబెట్టిన అత్యంత శక్తివంతమైన వాగ్దానం ఈ చిత్రం. ‘KGF2’ మరపురాని పాత్రలు, యాక్షన్‌తో మనల్ని ఓ అద్భుత ప్రయాణంలోకి తీసుకెళ్లింది. ప్రపంచ వ్యాప్త సినిమా రికార్డులను బద్దలు కొట్టడంతో పాటు ప్రేక్షకుల హృదయాలను గెలుచుకుంది. ఈ సంవత్సర కాలంలో ఎన్నో సరికొత్త రికార్డులు సృష్టించింది” అంటూ ఓ భారీ క్యాప్షన్ కూడా రాసుకొచ్చింది. వీడియో చివర్లో వాగ్దానం నిలబెట్టుకుంటున్నామంటూ 3 నెంబర్ ను షేక్ చేస్తూ వీడియోను ఎండ్ చేసింది.
ఈ వీడియోపై యశ్ ఫ్యాన్స్ ఆనందం వ్యక్తం చేస్తున్నారు. 'కేజీఎఫ్ చాప్టర్ 3'పై హింట్ ఇచ్చారంటూ సంబరాలు చేసుకుంటున్నారు. ఇక శ్రీనిధి శెట్టి హీరోయిన్ గా రావు రమేష్, ప్రకాష్ రాజ్, రవీనా టాండన్, సంజయ్ దత్ లు కీలక పాత్రలు పోషించిన ఈ సినిమా ఇండియన్ బాక్సాఫీస్ ను షేక్ చేసింది. ఈ సినిమాకి కొనసాగింపుగా వచ్చిన 'కేజీఎఫ్ చాప్టర్ 2' సైతం సెన్సేషన్ క్రియేట్ చేసింది. ప్రాంతంతో తేడా లేకుండా విడుద‌లైన ప్రతి భాష‌లోనూ వ‌సూళ్ళ పరంపరను కొనసాగించింది. బాలీవుడ్‌లో ఈ చిత్రం సరికొత్త రికార్డులను క్రియేట్ చేసింది. దాంతో పాటు ప్రపంచవ్యాప్తంగా రూ.1200 కోట్లకు పైగా కలెక్షన్స్ ను సాధించిన ఇండియన్ సినిమాగా రికార్డు సృష్టించింది.
