మహారాష్ట్రలోని గడ్చిరోలి జిల్లా రేపనపల్లి అటవీ ప్రాంతంలో మంగళవారం తెల్లవారుజామున మావోయిస్టులకు, పోలీసులకు మధ్య కాల్పులు జరిగాయి. ఈ ఘటనలో నలుగురు మావోయిస్టులు మృతిచెందారు.
మంచిర్యాల/మహదేవపూర్, వెలుగు: మహారాష్ట్రలోని గడ్చిరోలి జిల్లా అహెరీ తాలూకా రేపనపల్లి అటవీ ప్రాంతంలో మంగళవారం తెల్లవారుజామున మావోయిస్టులకు, పోలీసులకు మధ్య భారీ ఎన్కౌంటర్ జరిగింది. ఈ ఘటనలో నలుగురు మావోయిస్టులు మృతిచెందారు. వీరిలో ఉమ్మడి ఆదిలాబాద్ జిల్లాలోని మంగి–ఇంద్రవెల్లి ఏరియా కమిటీ సెక్రటరీ, కుమ్రం భీమ్ ఆసిఫాబాద్–మంచిర్యాల డివిజన్ కమిటీ మెంబర్ వర్గీశ్.. సిర్పూర్– చెన్నూర్ ఏరియా కమిటీ సెక్రటరీ మగ్తు.. ప్లాటూర్ మెంబర్స్ కుర్సింగ రాజు, కుడ్మెత వెంకటేశ్ ఉన్నట్టు గడ్చిరోలి ఎస్పీ నీలోత్పల్ ప్రకటించారు.
ఈ నలుగురు ఉమ్మడి ఆదిలాబాద్ జిల్లా నుంచి ప్రాణహిత నది దాటి గడ్చిరోలి జిల్లాలోకి ప్రవేశించారని ఎప్పీ చెప్పారు. లోక్సభ ఎన్నికల నేపథ్యంలో విధ్వంస కార్యకలాపాలకు పాల్పడే చాన్స్ ఉందని సమాచారం అందినట్టు తెలిపారు. ఈ మేరకు అహేరి పోలీస్ సబ్ డివిజన్ అడిషనల్ ఎస్పీ (ఆపరేషన్స్) యతీశ్ దేశ్ముఖ్ ఆధ్వర్యంలో సీ60, సీఆర్పీఎఫ్, క్యాట్ బలగాలు గాలింపు చర్యలు చేపట్టాయన్నారు. ఈ క్రమంలో రేపనపల్లికి ఐదు కిలోమీటర్ల దూరంలో గల కోలమర్క గుట్టల్లో కూంబింగ్చేస్తున్న పోలీసులపై మావోయిస్టులు అకస్మాత్తుగా ఫైరింగ్ చేయడంతో ఎదురుకాల్పులు జరిపారని చెప్పారు.
ఫైరింగ్ ముగిసిన తర్వాత ఆ ప్రాంతంలో పరిశీలించగా నలుగురి డెడ్బాడీలు కనిపించినట్టు వెల్లడించారు. సంఘటన స్థలం నుంచి ఒక ఏకే 47, ఒక కార్బన్ గన్, రెండు కంట్రీమేడ్ పిస్టల్స్, విప్లవ సాహిత్యంతో పాటు సామగ్రిని పోలీసులు స్వాధీనం చేసుకున్నారు. ఈ నలుగురిపై మహారాష్ట్రలో రూ.36 లక్షల రివార్డు ఉన్నట్టు సమాచారం. మృతులంతా చత్తీస్గఢ్ రాష్ట్రానికి చెందిన వారని, కొంతకాలంగా ఉమ్మడి ఆదిలాబాద్ జిల్లాలో కార్యకలాపాలు సాగిస్తున్నారని తెలుస్తున్నది.
చత్తీస్గఢ్లో మరో మావోయిస్టు మృతి..
భద్రాచలం, వెలుగు: చత్తీస్గఢ్ రాష్ట్రంలోని బీజాపూర్, దంతెవాడ జిల్లాల సరిహద్దుల్లో మంగళవారం జరిగిన ఎన్కౌంటర్లో ఓ మావోయిస్టు చనిపోయాడు. కిరండోల్ పోలీస్ స్టేషన్పరిధిలోని పురంగేల్–గంపూర్గ్రామ అడవుల్లో డీఆర్జీ, బస్తర్ఫైటర్స్ సంయుక్తంగా కూంబింగ్కు వెళ్లిన సమయంలో ఈ ఘటన జరిగింది. సంఘటన స్థలంలో మావోయిస్టు డెడ్బాడీతో పాటు, తుపాకీ, మందుగుండు సామగ్రిని స్వాధీనం చేసుకున్నారు. పలువురు మావోయిస్టులు గాయాలతో అడవిలోకి పారిపోయారని పోలీసులు చెప్తున్నారు. వారి కోసం గాలింపు చర్యలు ముమ్మరం చేసినట్లు చెప్పారు.
