కరకగూడెం, వెలుగు : పుట్టింటికి వెళ్లిన భార్య తిరిగి రావడం లేదని భర్త సూసైడ్ చేసుకున్నాడు. ఈ ఘటన మండల పరిధిలోని నాగారంలో శుక్రవారం జరిగింది. ఎస్సై రాజేందర్ తెలిపిన వివరాల ప్రకారం.. గ్రామానికి చెందిన శోభన్ (36)కు అశ్వాపురం సమీపంలోని తండాకు చెందిన ఓ యువతితో వివాహం జరిగింది. నాలుగు నెలల కింద భార్యాభర్తల మధ్య చిన్న వివాదం ఏర్పడింది. దీంతో ఆమె తన పుట్టింటికి వెళ్లిపోయింది.
అప్పటి నుంచి తిరిగి రాకపోవడంతో మనస్తాపానికి గురైన శోభన్ గురువారం పురుగుల మందు తాగాడు. అతడిని వెంటనే స్థానికులు మణుగూరు ప్రభుత్వ ఆసుపత్రికి, అక్కడి నుంచి కొత్తగూడెం ప్రభుత్వ ఆస్పత్రికి తరలించారు. చికిత్స పొందుతూ శోభన్ శుక్రవారం చనిపోయాడు. మృతుడి తల్లి ఫిర్యాదు మేరకు పోలీస్ స్టేషన్లో కేసు నమోదు చేశామని ఎస్సై తెలిపారు.
