- ఎఫ్టీఎల్ పరిధిలో ఉన్న నెక్లెస్ రోడ్ను తొలగిస్తారా?
- నాలాలపై కట్టిన జీహెచ్ఎంసీ పరిస్థితి ఏంటీ?
- గోల్ఫ్ కోర్టు కూడా ఎఫ్టీఎల్ పరిధిలోనే ఉంది
- మేయర్ను కలిసి ఫిర్యాదు చేస్తానని వెల్లడి
హైదరాబాదాద్, వెలుగు: ఎఫ్టీఎల్పరిధిలో నిర్మించిన ప్రభుత్వ సంస్థలను కూడా హైడ్రా కూల్చేస్తుందా? అని మజ్లిస్ పార్టీ చీఫ్, హైదరాబాద్ ఎంపీ అసదుద్దీన్ప్రశ్నించారు. హైదరాబాద్లో కొన్ని గవర్నమెంట్బిల్డింగులను ఎఫ్టీఎల్లోనే కట్టారని, వాటిపై కూడా చర్యలు తీసుకుంటారా? అని అడిగారు. ఆదివారం ఆయన వక్ఫ్ చట్టంపై నిర్వహించిన మీడియా సమావేశంలో హైడ్రాపై ఆయన ఫైర్అయ్యారు.
‘‘హుస్సేన్ సాగర్ ఎఫ్టీఎల్ పరిధిలో ఉన్న నెక్లెస్ రోడ్ను కూడా తొలగిస్తారా? సాక్షాత్తు జీహెచ్ఎంసీ హెడ్ ఆఫీస్ ను కూడా నాలాపై నిర్మించారు. హిమాయత్సాగర్ ఎఫ్టీఎల్ పరిధిలో సీసీఎంబీ కట్టారు. గోల్కొండలో ఉన్న చెరువులో గోల్ఫ్ కోర్టు ఉంది. ఆ గోల్ఫ్ కోర్టులో ఐపీఎస్, ఐఏఎస్ అధికారులు గోల్ఫ్ ఆడుతారు. అక్కడికి వెళ్లి చూడండి.. లేదంటే ఫొటోలు కావాలంటే నేను ఇస్తాను. దానిని కూడా తొలగిస్తారా?”అని అసదుద్దీన్ ప్రశ్నించారు. ఎఫ్టీఎల్ సమస్యపై జీహెచ్ఎంసీ మేయర్ను కలిసి ఫిర్యాదు చేస్తానని, ప్రభుత్వం ఏ నిర్ణయం తీసుకుంటుందో చూస్తానని అసదుద్దీన్ పేర్కొన్నారు.
ముస్లింలు లేకుండా చేయాలని బీజేపీ చూస్తోంది..
వక్ఫ్ బోర్డుకు వ్యతిరేకంగా బీజేపీ బిల్ ప్రవేశ పెడుతూ.. ముస్లింలు లేకుండా చేయాలని చూస్తోందని ఎంపీ అసదుద్దీన్ఆరోపించారు. ‘‘మజీద్ లు, దర్గాల లాగే వక్ఫ్ ఆస్తులు కూడా ప్రభుత్వ ప్రాపర్టీ కాదు. ఎప్పటి నుంచో ఉన్న వక్ఫ్ ప్రాపర్టీలకు డీడ్ ఎలా ఉంటుంది. మక్కా మసీద్కు డీడ్ కావాలంటే ఎక్కడ తేవాలి’ అని కేంద్ర ప్రభుత్వాన్ని ఎంపీ అసదుద్దీన్ ఒవైసీ ప్రశ్నించారు. వక్ఫ్ ప్రాపర్టీస్ను ఖతం చేయాలని బీజేపీ ప్రభుత్వం ప్రయత్నిస్తోందని ఆరోపించారు.
మజ్లిస్ పార్టీ ఆలిండియా పర్సనల్ లా బోర్డ్ ప్రతినిధులతో కలిసి నాన్ బీజేపీ సీఎంలను కలుస్తున్నామని తెలిపారు. ‘‘ఇటీవల తమిళనాడు సీఎం స్టాలిన్ను కలిశాం. తాజాగా తెలంగాణ సీఎం రేవంత్ను కలిశాం. బీజేపీ ఎన్డీయే గవర్నమెంట్ వక్ఫ్ అమెండ్మెంట్ బిల్లులో పొందుపరిచిన ప్రమాదకర అంశాలను వక్ఫ్ ప్రొవిజన్లను వివరించాం. కేసీ వేణుగోపాల్తో మాట్లాడి.. ఈ క్లాజ్ బై క్లాజ్ గురించిచెప్పాం. ఈ విషయంలో మాజీ మంత్రి, రాష్ట్ర ప్రభుత్వ సలహాదారు షబ్బీర్ అలీ పార్టీ సెంట్రల్ లీడర్లతో మాట్లాడతామని హామీ ఇచ్చారు”అని అసదుద్దీన్ తెలిపారు. వైఎస్సార్ సీపీ పార్లమెంట్లో ఆ బిల్లును వ్యతిరేకించిందన్నారు.
ఆలిండియా పర్సనల్ లా బోర్డ్ ప్రతినిధులతో కలిసి ఏపీ సీఎం చంద్రబాబును, బీహార్ సీఎం, చిరాగ్ పాశ్వాన్ను కలిసి వక్ఫ్ బిల్లుపై తమ వాదనలు వినిపిస్తామని చెప్పారు. మోదీ ప్రభుత్వం సెక్షన్ 40లో అబ్యూస్ అయితే అలాంటి వాటి ఉదాహరణలు చెప్పాలని డిమాండ్ చేశారు. ఆర్టికల్25 26 ఉల్లంఘన జరుగుతోందని, భవిష్యత్తులో పబ్లిక్ మీటింగ్లు పెట్టి, ప్రతిపక్ష నేతలను కలిసి ఉద్యమిస్తామని అసదుద్దీన్ వెల్లడించారు.
