బషీర్బాగ్, వెలుగు: హైదరాబాద్ సిటీ పోలీస్ పరిధిలోని క్లూస్ టీమ్లో తాత్కాలిక ప్రాతిపదికన 17 స్పెషల్ పోలీస్ ఆఫీసర్స్ (ఎస్పీఓ) పోస్టుల భర్తీకి అర్హులైన అభ్యర్థుల నుంచి దరఖాస్తులు స్వీకరిస్తున్నట్లు సీఎఆర్ హెడ్క్వార్టర్స్ అండ్ ట్రైనింగ్ డీసీపీ ఒక ప్రకటనలో తెలిపారు. ఫొటోగ్రాఫర్స్, వీడియోగ్రాఫర్స్ విభాగాల్లో జరిగే ఈ నియామకాలకు తెలంగాణకు చెందిన మాజీ సైనికులు (వయస్సు 58 ఏళ్ల లోపు), గత రెండేళ్లలో పదవీ విరమణ పొందిన మాజీ పారామిలిటరీ, పోలీస్ సిబ్బంది (గరిష్ట వయస్సు 62 ఏళ్లు) అర్హులని, వారికి ఫొటోగ్రఫీ/వీడియోగ్రఫీలో సాంకేతిక పరిజ్ఞానం, అనుభవం తప్పనిసరి అని పేర్కొన్నారు.
ఎంపికైన వారికి నెలకు రూ.26,000 గౌరవ వేతనం చెల్లిస్తామని, వీరికి ఎలాంటి సెలవులు వర్తించవని, లీవ్ పెడితే ఆ రోజు వేతనం మినహాయించబడుతుందని స్పష్టం చేశారు. అర్హులైన అభ్యర్థులు డిశ్చార్జ్ బుక్/రిటైర్మెంట్ ఆర్డర్, ఆధార్, పాన్ కార్డు, ఎస్బీఐ బ్యాంక్ పాస్బుక్ జిరాక్స్, ఓటర్ ఐడీ, కుల ధ్రువీకరణ పత్రం, మూడు పాస్పోర్ట్ సైజు ఫొటోల ఒరిజినల్స్, జిరాక్స్ ప్రతులతో హైదరాబాద్ పెట్లబుర్జ్లోని కార్ హెడ్క్వార్టర్స్ లో ఉన్న ఎస్పీఓ కార్యాలయాన్ని వ్యక్తిగతంగా సందర్శించి, ఈ నెల 20 సాయంత్రం 5 గంటల లోపు దరఖాస్తులు సమర్పించాలని సూచించారు.
