ఏ హోటల్కు వెళ్లినా.. పైసలిస్తేనే భోజనం పెడతారు. కానీ ఇక్కడ మాత్రం పైసలకు బదులు ప్లాస్టిక్ ఇస్తే చాలు. కమ్మని రుచులతో కడుపు నిండా భోజనం పెడతారు. అవసరమైతే టీ షర్టులు కూడా ఇస్తారు. ‘ప్లాస్టిక్ తగ్గాలి, పర్యావరణం బాగుండాలి’ అనే లక్ష్యంగా, ఈ కాన్సెప్ట్ను తీసుకొచ్చారు.
రోడ్ల పక్కన, చెత్త కుప్పల్లో, వీధుల వెంట తిరిగి, ప్లాస్టిక్ చెత్తను ఏరి బతికేవాళ్లు చాలామంది ఉంటారు. వాళ్లంతా సేకరించిన ప్లాస్టిక్ను అమ్మి కడుపు నింపుకుంటారు. రోజంతా తిరిగి సేకరించిన చెత్తను అమ్మి, వచ్చే డబ్బుతో పొట్టనింపుకునేది ఒక్కపూట మాత్రమే అయితే పేదల కడుపు నింపడానికి, అదే సమయంలో ప్లాస్టిక్ను నిర్మూలించడానికి మున్సిపల్ అదికారులు ‘పర్యావరణం బాగుండాలి. పేదల ఆకలి తీరాలి’ అనే ఆలోచనతో మున్సిపల్ అధికారులు ఈ రకమైన స్కీమ్ను తీసుకొచ్చారు. ఇది ఎంతోమంది పేదలకు వరంగా మారింది. కిలో, అరకిలో ప్లాస్టిక్ సేకరించి ఇస్తే, కడుపునిండా భోజనం పెడతారు. ఇలా చెయ్యడం వల్ల పర్యావరణ పరిరక్షణకు కృషి చేసినట్టు అవుతారని అధికారుల ఆలోచన. పర్యావరణ ప్రేమికులకు ఈ కాన్సెప్ట్ నచ్చి అవగాహన కల్పిస్తున్నారు.
డిఫరెంట్గా…
రోజురోజుకు ప్లాస్టిక్ పెరుగుతోందే తప్ప, తగ్గడం లేదు. ఎటు చూసినా గుట్టలుగుట్టలుగా పేరుకుపోయి కనిపిస్తున్నాయి. ఆరోగ్యం, పర్యావరణంపై ప్రభావం చూపుతోంది. ప్లాస్టిక్ నిర్మూలన కోసం ఎంతోమంది ఎన్నో ప్రయత్నాలు చేస్తుంటారు. కానీ ఢిల్లీ, భువనేశ్వర్ మున్సిపల్ కార్పొరేషన్లు డిఫరెంట్గా ఆలోచించి ‘ప్లాస్టిక్ ఫర్ మీల్స్’ స్కీమ్ను తీసుకొచ్చాయి.
కలర్ఫుల్ హోర్డింగ్స్
కొత్తగా ఆలోచించడమే కాకుండా ‘ప్లాస్టిక్ ఫర్ మీల్స్’ స్కీమ్ పేరుతో జనాలకు మరింత దగ్గర చేస్తున్నాయి. ఇందుకోసం పెద్ద పెద్ద హోర్డింగ్లు, పెయింటింగ్లు రెడీ చేసి, ప్రధాన సెంటర్లలో ఏర్పాటు చేస్తున్నాయి. ‘ప్లాస్టిక్ ఇస్తే ఫ్రీ మీల్స్’ అంటూ ప్రతిఒక్కరి దృష్టిని ఆకర్షిస్తున్నాయి. ఢిల్లీ, భువనేశ్వర్ సిటీల్లో చాలా సెంటర్లలో హోర్డింగ్స్ కనిపిస్తున్నాయి. ప్లాస్టిక్ బ్యాగ్స్, బాటిల్స్ సేకరించి ఇస్తే భోజనం పెడతాయి. భోజనం తినడానికి ఇష్టపడనివాళ్ల కోసం జ్యూట్ బ్యాగ్లు, టీషర్టులు, బట్టలను అందిస్తున్నాయి. పేదవాళ్లే కాకుండా, మధ్య తరగతి, ధనిక కుటుంబాల వాళ్లు ప్లాస్టిక్ తెచ్చేందుకు ముందుకొస్తున్నారు.
ఎకో హబ్ ఆన్ వీల్స్
ప్లాస్టిక్ను తగ్గించేందుకు ఢిల్లీ, భువనేశ్వర్ మున్సిపాలిటీలు ‘ఆన్ వీల్స్’ అంటూ జనాల దగ్గరికే వెళ్తున్నాయి. గల్లీగల్లీ తిరుగుతూ కిలోల లెక్కన చెత్తను, ప్లాస్టిక్ను సేకరిస్తుంది. పేపర్, స్టీల్, గ్లాసులు, బాటిళ్లు.. ఇలా ప్లాస్టిక్కు సంబంధించిన ఏదైనా సరే సేకరిస్తుంది. సేకరించిన చెత్తపై డిస్కౌంట్ ఇస్తూ బట్టలు, ఇతర వస్తువులు కొనడానికి కూపన్లు ఇస్తున్నాయి. ‘‘ఒక కిలో ప్లాస్టిక్ వేస్ట్ తీసుకొచ్చేవారికి భోజనం, గ్రాములు, కిలోల లెక్కన ప్లాస్టిక్ తీసుకొచ్చేవారికి బ్రేక్ఫాస్ట్ పెడతాం. ఇలా సేకరించే ప్లాస్టిక్ చెత్తతో రిసైక్లింగ్తో పాటు మున్సిపాలిటీ రోడ్లను వేస్తాం. ఇప్పటికే లక్షలకొద్దీ ప్లాస్టిక్ బ్యాగ్లను సేకరించాం. చాలా ఏరియాల్లో ప్లాస్టిక్ నిషేధం కూడా విధించాం. ఎక్కడా ప్లాస్టిక్ వ్యర్థాలే కనిపించకుండా చేయాలనేది మా ప్లాన్” అని అంటారు అక్కడి అధికారులు. ఢిల్లీ, భువనశ్వేర్ నగరాల్లోనే కాకుండా, దేశంమొత్తం ఇలాంటి స్కీములు తీసుకురావాలని పర్యావరణ ప్రేమికులు కోరుతున్నారు కూడా.