మెట్ పల్లి, వెలుగు: మెట్ పల్లి మహాత్మా జ్యోతి బా పూలే గురుకుల రెసిడెన్షియల్ స్కూల్ లో బయటి నుంచి తీసుకొచ్చిన ఉగాది పచ్చడి తాగి 29 మంది స్టూడెంట్లు అస్వస్థతకు గురయ్యారు. కడుపునొప్పి, వాంతులు, మోషన్స్ తో ఇబ్బందులు పడగా మెట్పల్లి ప్రభుత్వ దవాఖానాకు తరలించారు. కొద్ది రోజుల క్రితమే స్కూల్ బిల్డింగ్ రెండో అంతస్తు నుంచి ఓ స్టూడెంట్ కిందపడి గాయపడగా శనివారం ఈ ఘటన చోటు చేసుకుంది. పట్టణ శివారులో ఓ ప్రైవేట్బిల్డింగ్ లో కొన్నేండ్లుగా మహాత్మా జ్యోతిబాపూలే రెసిడెన్షియల్ స్కూల్ నిర్వహిస్తున్నారు. శనివారం ఉగాది నేపథ్యంలో ఐదో తరగతి చదువుతున్న ఓ స్టూడెంట్ పేరెంట్స్ రెండు లీటర్ల వాటర్ బాటిల్ లో ఉగాది పచ్చడి తీసుకువచ్చి ఇచ్చారు. మధ్యాహ్నం సదరు స్టూడెంట్ పచ్చడిని 40 మంది విద్యార్థులకు పోసింది. సాయంత్రం 5 గంటల ప్రాంతంలో నలుగురికి కడుపునొప్పితో పాటు మోషన్స్ మొదలయ్యాయి. టీచర్ కు చెప్పగా ఓఆర్ఎస్ తాగించారు. కడుపునొప్పి తగ్గలేదని చెప్పినా హాస్పిటల్ కు తీసుకువెళ్లలేదు. చివరికి రాత్రి 9 గంటల ప్రాంతంలో మెట్ పల్లి సివిల్ హాస్పిటల్ కు తరలించి అడ్మిట్ చేశారు. ఆదివారం తెల్లవారుజామున కూడా 22 మందికి కడుపునొప్పి, వాంతులు, మోషన్స్ కాగా, హాస్పిటల్ కు తరలించారు. మధ్యాహ్నం మరో ముగ్గురు కూడా అడ్మిట్అయ్యారు. దీంతో అస్వస్థతకు గురైన విద్యార్థుల సంఖ్య 29కి చేరుకుంది. హాస్పిటల్ లో బెడ్లు సరిపోకపోవడంతో ఒక్కో బెడ్ పై ఇద్దరిని పడుకోబెట్టి ట్రీట్మెంట్ ఇచ్చారు. ఈ విషయం తెలుసుకున్న స్టూడెంట్స్ తల్లిదండ్రులు హాస్పిటల్కు చేరుకుని తమకు ఎందుకు చెప్పలేదంటూ స్కూల్ స్టాఫ్పై మండిపడ్డారు. ఎమ్మెల్యే విద్యాసాగర్రావు దవాఖానాకు వచ్చి స్టూడెంట్స్ను పరామర్శించారు. బయటి నుంచి తెచ్చిన పచ్చడిని ఎలా అనుమతించారని ప్రిన్సిపాల్, టీచర్లపై ఆగ్రహం వ్యక్తం చేశారు. విద్యార్థుల బాధను చూసిన డాక్టర్ అమరేశ్వర్ వారికి వాటర్ బాటిల్స్, ఫ్రూట్స్ పంపిణీ చేశారు.
స్టాఫ్ తక్కువగా ఉండడంతో చూడలే..
బయట ఫుడ్ స్కూల్ లోపలికి ఎట్టి పరిస్థితుల్లో అనుమతించం. ఉగాది కావడం, సిబ్బంది తక్కువగా ఉండడం, పేరెంట్స్ ఎక్కువగా రావడంతో గమనించలేకపోయాం. ఈ ఘటనపై విచారణ చేస్తాం.
- ఆనందం, ప్రిన్సిపాల్
