నిజామాబాద్ జిల్లా మంచిప్పలో తమ భూములు తిరిగివ్వాలంటూ పలువురు పురుగు మందు తాగుతామని నిరసన తెలపడం తీవ్ర ఉద్రిక్తతలకు దారి తీసింది. పోలీసులు తెలిపిన వివరాల ప్రకారం.. మంచిప్పలో ఓ సంస్థ చేపట్టిన ప్రాజెక్టులో 21 వ ప్యాకేజీ నిర్మాణానికి పలువురు రైతులు భూములు లీజ్కి ఇచ్చారు.ఆ భూముల్ని తిరిగి ఇవ్వాలని చాలా రోజులుగా కర్షకులు డిమాండ్ చేస్తున్నారు.
సంస్థ భూముల్ని తిరిగి ఇవ్వకపోవడంతో నిర్మాణ పనుల వద్ద ఆందోళనలు తెలిపారు. ఈ క్రమంలో పలువురు రైతులు పురుగుల మందు తాగడానికి యత్నించారు. పక్కన ఉన్న వారు చేతిలోంచి డబ్బాను లాక్కున్నారు. నవయుగ కంపెనీ తమ భూములు కబ్జా చేస్తోందంటూ వారు ఆరోపిస్తున్నారు. మరి కొందరు రైతులు టవర్ ఎక్కి నిరసన తెలిపారు. భూములు వెంటనే అప్పగించాలని వారు డిమాండ్ చేశారు.
