ముంబై: జనరల్ ఎలక్షన్స్ సమీపిస్తున్న వేళ ఇండియా కూటమిలోని మిత్రపక్షాలతో సీట్ల సర్దుబాటుపై ఏకాభిప్రాయానికి కాంగ్రెస్ కసరత్తు చేస్తున్నది. సీట్ల పంపకాల విషయంలో ఇప్పటికే ఢిల్లీలో ఆమ్ ఆద్మీ పార్టీ(ఆప్), యూపీలో సమాజ్ వాదీ పార్టీ(ఎస్పీ)తో చర్చలు ఓ కొలిక్కి రాగా.. మహారాష్ట్రలో శివసేన(యూబీటీ)ను కూడా ఒప్పించేందుకు ప్రయత్నాలు ముమ్మరం చేసింది. ఆ రాష్ట్రంలో మొత్తం 48 లోక్ సభ స్థానాలు ఉండగా 39 సీట్లపై ఒప్పందం కుదిరినట్లు కాంగ్రెస్ పార్టీ వర్గాలు శుక్రవారం వెల్లడించాయి.
మరో 9 సీట్ల విషయమై మహావికాస్ అఘాడీ మధ్య చర్చల్లో ప్రతిష్టంభన నెలకొంది. దాంతో కాంగ్రెస్ మాజీ అధ్యక్షుడు రాహుల్ గాంధీ స్వయంగా రంగంలో దిగారు. శివసేన (యూబీటీ) చీఫ్ ఉద్ధవ్ ఠాక్రేతో రాహుల్ ఫోన్ లో మాట్లాడారు. ముంబైలో 6 లోక్ సభ స్థానాలు ఉండగా.. 3చోట్ల కాంగ్రెస్ పోటీ చేయాలని భావిస్తున్నది. అయితే, ఉద్ధవ్ వర్గం ముంబైలో 4 సీట్లు సహా మొత్తం 18 పార్లమెంటు స్థానాలు కావాలని కోరుతున్నది. మరోవైపు సీట్ల సర్దుబాటుపై శరద్ పవార్తోనూ రాహుల్ చర్చలు జరిపారు.
మమతను ఒప్పించేందుకు ..
యూపీలోని 80 సీట్లలోని 17 స్థానాల్లో కాంగ్రెస్ పోటీ చేయనుంది. మిగిలిన 63 చోట్ల ఎస్పీ, ఇతర మిత్రపక్షాలు బరిలో దిగుతాయి. ఢిల్లీలో 4 చోట్ల ఆప్, 3 చోట్ల కాంగ్రెస్ పోటీ చేసేందుకు ఒప్పందం కుదిరింది. బెంగాల్లో టీఎంసీ చీఫ్, సీఎం మమతా బెనర్జీ కాంగ్రెస్‌‌కు 2 స్థానాలకు మించి ఇవ్వలేమని గతంలో తెలిపారు. కాంగ్రెస్ అంగీకరించకపోవటంతో అన్ని స్థానాల్లో ఒంటరిగా పోటీచేయనున్నట్లు ఆమె ప్రకటించారు. ఈ నేపథ్యంలో బీజేపీ బలంగా ఉన్న 5 స్థానాల్లో తమకు అవకాశం ఇవ్వాలని కాంగ్రెస్ కోరనున్నట్లు తెలుస్తున్నది.
