ఎటువంటి రణగొణ ధ్వనులు లేకుండా నేచర్ మధ్యలో కూర్చుని ఆకాశంలో నక్షత్రాలు చూస్తూ , మూన్లైట్ డిన్నర్ చేస్తే... భలే ఉంటుంది. కానీ అంత ప్రశాంతమైన ప్లేస్ ఎక్కడ అంటున్నారా? ‘గ్లాస్హౌస్’ హోటల్స్లో ఉంటే ఆ అనుభూతిని పొందొచ్చు. ఇండియాలో ఇలాంటి ఫేమస్ అయిన హోటల్స్ కొన్ని ఉన్నాయి. అక్కడ ఉంటే ప్రకృతి ఒడిలోకి వెళ్లినట్లే అనిపిస్తుంది. అవి ఏయే రాష్ట్రాల్లో ఉన్నాయో తెలిస్తే ఒకసారి వెళ్లి చూడొచ్చు!
ఫారెస్ట్ హిల్స్
మహారాష్ట్రలోని తల అనే ప్లేస్లో రిసార్ట్ ఫీచర్స్తో ఉన్న గ్లాస్ హౌస్ ఉంది. అక్కడ గాజు గోడల నుంచి వ్యాలీ అందాలు చూస్తుంటే మైమరిచిపోవాల్సిందే. రెండు అంతస్తుల బిల్డింగ్లో ప్రతి రూమ్కు బాల్కనీ ఉంది. ఇంటి బయట బాత్టబ్ ఉంటుంది.
గ్లాస్హౌజ్ సెలెస్టె
ఉత్తరాఖండ్లోని రాణీఖేత్లో త్రీ బెడ్రూమ్ విల్లా ఉంది. ఈ విల్లాలో పొడవుగా ఉండే గ్లాస్ కిటికీల నుంచి వ్యాలీని 360 డిగ్రీల్లో చూడొచ్చు. హిమాలయాలు కనిపిస్తాయి. ఒక కిటికీ నుంచి సూర్యోదయం పలకరిస్తే మిగతా రెండు కిటికీల నుంచి సూర్యాస్తమయాలు వీడ్కోలు చెప్తుంటాయి. టెలిస్కోప్ కూడా ఉంటుంది.
గ్లాస్హౌస్ ఆన్ దిబే
గోవాలోని చపరాలో ఉన్న దిబేలో నీటి అంచున కూర్చుని నీటి అలల మీద పడుతున్న సూర్య కిరణాల దోబూచులాటను ఎంజాయ్ చేయొచ్చు. ఈ హౌస్ అంతా గ్లాస్తో ఉండనప్పటికీ వాటర్ ఫ్రంట్ విల్లా నుంచి సముద్రం చూడడం బాగుంటుంది. కామన్ ఏరియాను గ్లాస్ వాల్స్తో కట్టడం వల్ల చూడటానికి గ్లాస్ హౌస్ లా అనిపిస్తుంది.
ప్రైమ్రోజ్ విల్లాస్
కర్నాటకలోని చిక్కమగళూరుకి వెళ్లాలంటే బెంగళూరు నుంచి నాలుగు గంటల డ్రైవ్. ఇక్కడ ప్రైమ్రోజ్ విల్లా ఉంది. ఈ విల్లాలో బెడ్రూమ్స్, డైనింగ్ స్పేస్ నుంచి బాత్టబ్ వరకు ఎక్కడి నుంచి చూసినా పర్వతాలు పలకరిస్తాయి.
శక్తి 360 లెటి
ఉత్తరాఖండ్లోని బాగేశ్వర్లో సముద్రానికి ఎనిమిది వేల అడుగుల ఎత్తున ఉంది. కావాల్సినవి ప్యాక్ చేసుకుని కొంతదూరంలో ఉన్న నదికి వెళ్లి ఫిషింగ్ చేయొచ్చు. ఇంటికి మూడు వైపులా ప్యానెల్డ్ గ్లాస్ వాల్స్ ఉంటాయి. మూడు బెడ్రూమ్ల నుంచి హిమాలయాలు కనిపిస్తాయి. శీతాకాలంలో ఈ స్టే అందుబాటులో ఉండదు.
ది తారా హౌస్
హిమాచల్ ప్రదేశ్లోని, మనాలిలో హిల్టాప్ మీద ఉన్న రెండు బెడ్రూమ్ల బొటిక్ లాడ్జ్ ఇది. మనాలి సిటీ సెంటర్ నుంచి కొన్ని కిలోమీటర్ల దూరంలో ఉంటుంది. రాత్రుళ్లు నక్షత్రాల కాన్వాస్గా మారిపోతుంది ఈ గ్లాస్హౌస్. ఇక్కడ స్టే చేసిన వాళ్లకు మంచుతో కప్పుకున్న పర్వతశిఖరాలు వెల్కం చెప్తాయి.
ది గ్లాస్హౌస్
మహారాష్ట్రలోని పంచ్గనిలో స్టే చేసేందుకు సింగిల్ బెడ్రూమ్ సెలక్ట్ చేసుకోవడం బెటర్. దాని పక్కనే నాలుగు బెడ్రూమ్ల ఇటుక విల్లా కాంప్లెక్స్ కూడా ఉంటుంది. ఈ రెండిటిని కలిపి లేదా విడిగా కూడా బుక్ చేసుకోవచ్చు. గ్లాస్హౌస్ గోడలు ఫ్రెంచ్ విండోస్తో ఉంటాయి.
ది గ్లాస్స్కేప్
మహారాష్ట్రలోని నాసిక్లో ఉంటుంది ది గ్లాస్స్కేప్. మూడు వైపులా గాజు గోడలతో అవుట్డోర్, ఇండోర్స్ కలిసిపోయినట్టే ఉంటాయి. టు బెడ్రూమ్స్ ఉన్న ఈ ఇంటిలో ఏ మూల నుంచి చూసినా ప్రకృతి అందాలే కనిపిస్తాయి. ప్రైవేట్ స్విమ్మింగ్ పూల్కి గెస్ట్లు వెళ్లొచ్చు. అలాగే ఇండోర్ గేమ్స్ కూడా ఆడుకోవచ్చు. అదనంగా డబ్బు కడితే బార్బెక్యు పిట్ వాడుకోవచ్చు. చలిమంట కాచుకోవచ్చు.
