బషీర్బాగ్,వెలుగు: పదేళ్లుగా మన దేశం ఆర్థిక ప్రగతిలో దూసుకెళ్తోందని కేంద్ర రైల్వే శాఖ మంత్రి అశ్విని వైష్ణవ్ అన్నారు. ప్రధాని మోదీ నేతృత్వంలో ప్రపంచ జీడీపీ ర్యాంకింగ్ లో ఇండియా నాలుగో స్థానంలో నిలిచిందన్నారు. నారాయణగూడలోని కేశవ్ మెమోరియల్ కాలేజీలో కేశవ్ మెమోరియల్ ఎడ్యుకేషన్ సొసైటీ 85వ ఫౌండేషన్ డే నిర్వహించగా కేంద్ర మంత్రి కిషన్ రెడ్డితో కలిసి ఆయన గెస్ట్గా పాల్గొన్నారు.
ఈ సందర్భంగా మాట్లాడుతూ.. కేశవ్ మెమోరియల్ ఎడ్యుకేషనల్ సొసైటీ స్వాతంత్య్రం కంటే ముందు ఏర్పడిందని, స్వాతంత్రోద్యమంలో ప్రత్యేక అనుబంధం ఉందని చెప్పారు. ఉన్నత ప్రమాణాలతో విద్య, విలువలను నేర్పుతున్న యాజమాన్యాన్ని అభినందించారు. కిషన్ రెడ్డి మాట్లాడుతూ... ఈ విద్యాసంస్థలకు దేశంలో గొప్ప ప్రత్యేకత ఉందన్నారు.
ఇక్కడ ఇంజినీరింగ్ , లా కాలేజీల్లో అడ్మిషన్లు దొరకడం చాలా కష్టమన్నారు. భవిష్యత్తులో అమెరికా, ఆస్ట్రేలియా నుంచి చదువు కోసం భారతదేశానికి వస్తారని, అందుకు కేశవ్ మెమోరియల్ ఇన్స్టిట్యూట్ పనితీరు నిదర్శనమన్నారు. మోదీ నేతృత్వంలో దేశం అన్ని రంగాల్లో ముందుంటోందన్నారు. అనంతరం కేశవ్ మెమోరియల్ విద్యాసంస్థల్లో ఉత్తమ మార్కులు సాధించిన విద్యార్థులను మంత్రులు మెమొంటోలతో సన్మానించారు.
