న్యూయార్క్: అమెరికాలోని శాన్ఫ్రాన్సిస్కోలో ఉన్న ఇండియన్ కాన్సులేట్ ఆఫీసుపై ఖలిస్తానీ మద్దతుదారులు దాడి చేశారు. ఫర్నీచర్కు నిప్పు పెట్టారు. ఆదివారం తెల్లవారుజామున ఒకటిన్నర నుంచి రెండున్నర గంటల మధ్య ఈ ఘటన జరిగింది. దీనికి సంబంధించిన వీడియోను ఖలిస్తానీ మద్దతుదారులు ట్విట్టర్లో పోస్టు చేశారు. యూఎస్ గవర్నమెంట్ ఈ దాడిని తీవ్రంగా ఖండించింది. కాన్సులేట్ ఆఫీస్ కాలిపోతున్న విజువల్స్ వీడియోలో స్పష్టంగా కనిపిస్తున్నాయి. హింస.. హింసను ప్రేరేపిస్తుందనే కామెంట్లతో పాటు పోయిన నెల కెనడాలోని గురుద్వారా ముందు హత్యకు గురైన ఖలిస్తాన్ టైగర్ ఫోర్స్ చీఫ్ హర్దీప్ సింగ్ నిజ్జర్కు సంబంధించిన పేపర్ కటింగ్స్ను కూడా వీడియోలో పెట్టారు..
బాధ్యులపై చర్యలు తీసుకుంటాం : యూఎస్
దాడిపై యూఎస్ విదేశాంగ ప్రతినిధి మాథ్యూ మిల్లర్ స్పందించారు. ‘‘శాన్ ఫ్రాన్సిస్కోలోని ఇండియన్ కాన్సులేట్పై జరిగిన దాడిని తీవ్రంగా ఖండిస్తున్నాం. యూఎస్లోని డిప్లమాటిక్ ఫెసిలిటీస్, ఫారిన్ డిప్లామాట్స్పై దాడిని క్రిమినల్ అఫెన్స్గా పరిగణిస్తాం. ఆదివారం తెల్లవారుజామున 1:30 నుంచి 2:30 మధ్య ఈ దాడి జరిగింది. శాన్ఫ్రాన్సిస్కో ఫైర్ డిపార్ట్మెంట్ వెంటనే స్పందించి మంటలు ఆర్పేసింది. ఖలిస్తానీ మద్దతుదారులు జరిపిన దాడిలో ఎవరూ గాయపడలేదు. వెంటనే పోలీసులు ఘటనా స్థలానికి చేరుకుని మరింత విధ్వంసం జరగకుండా ఆపారు. బాధ్యులపై కఠిన చర్యలు తీసుకుంటాం” అని మిల్లర్ హామీ ఇచ్చారు.
