వెల్దుర్తి/కొల్చారం, వెలుగు : మన ఊరు మన బడి పథకం కింద స్కూళ్లలో చేపట్టిన పనులు ఆగస్టు మొదటివారంలోగా పూర్తి చేయాలని మెదక్కలెక్టర్ రాజర్షి షా అధికారులకు సూచించారు. శుక్రవారం వెల్దుర్తి మండలంలోని కుకునూర్, వెల్దుర్తి ప్రభుత్వ బడుల్లో జరుగుతున్న పనులను ఆయన పరిశీలించారు. ఈ సందర్భంగా ఆయన మాట్లాడుతూ ప్రభుత్వం కోట్లాది రూపాయలతో చేస్తున్న పనుల్లో కాంట్రాక్టర్లు నిర్లక్ష్యం చేయకుండా త్వరగా పూర్తి చేయాలని చెప్పారు.
వెల్దుర్తిలోని జడ్పీహెచ్ఎస్లో రెండు, ప్రాథమిక పాఠశాలలో మూడు గదులు శిథిలమయ్యాయని, వాటిని వెంటనే కూల్చి కొత్త భవనాలు కట్టాలన్నారు. వెల్దుర్తి డబుల్ బెడ్ రూమ్ ఇండ్లను లబ్ధిదారులకు అలాట్ చేసినప్పటికీ చిన్నచిన్న సమస్యలు ఉన్నాయని, వాటిని తీర్చాలని కొందరు లబ్ధిదారులు కలెక్టర్ దృష్టికి తీసుకువెళ్లగా వెంటనే స్పందిస్తూ సమస్యలను పరిష్కరించాలని పంచాయతీరాజ్ఈఈ సత్యనారాయణరెడ్డిని ఆదేశించారు. వెల్దుర్తి పంచాయతీకి రెండు పల్లె దవాఖానాలు మంజూరు అయ్యాయని, కాంట్రాక్టర్లు నిర్మాణాలు త్వరగా చేపట్టాలని సూచించారు. ఆయన వెంటఅడిషనల్ కలెక్టర్ ప్రతిమా సింగ్, డీఈఓ రాధా కిషన్, ఎంపీడీవో వెంకటలక్ష్మి, హెచ్ఎం సాంబయ్య ఉన్నారు.
కొంగోడ్ సందర్శన
కొల్చారం మండలంలోని కొంగోడ్ గ్రామాన్ని కలెక్టర్ రాజర్షి షా, అడిషనల్ కలెక్టర్ ప్రతిమా సింగ్ శుక్రవారం సందర్శించారు. స్వచ్ఛ భారత్ మిషన్, స్వచ్ఛ సర్వేక్షణ్ మిషన్ లో భాగంగా కొంగోడ్ గ్రామాన్ని నామినేట్చేసినట్టు తెలిపారు. గ్రామంలో మురుగు నీటి వ్యవస్థను కలెక్టర్ పరిశీలించారు. ఈ వ్యవస్థ ఏర్పాటుకు 272 ఇంకుడు గుంతలు ఏర్పాటు చేస్తున్నట్లు డీపీఓ సాయిబాబా, ఎంపీడీఓ గణేశ్ రెడ్డి వివరించారు. తడిపొడి చెత్త వేరు చేసే విధానంపై గ్రామస్తులను అడిగి తెలుసుకున్నారు.
