- ఆలమట్టి ఎత్తు పెంపు కేసులో సుప్రీంలో తెలంగాణ వాదన
న్యూఢిల్లీ, వెలుగు: కర్నాటక నుంచి నీళ్లు సముద్రంలో కలుస్తున్నాయన్న ఆ రాష్ట్ర వాదనపై సుప్రీంకోర్టులో తెలంగాణ ప్రభుత్వం అభ్యంతరం వ్యక్తం చేసింది. అసలు శ్రీశైలం, నాగార్జున సాగర్ ప్రాజెక్టులకే నీళ్లు రానప్పుడు సముద్రంలోకి ఎలా కలుస్తాయని ప్రభుత్వ తరఫు సీనియర్ లాయర్ వైద్యనాథన్ వాదనలు వినిపించారు. కర్నాటక లో కృష్ణా నది నుంచి సముద్రం చాలా దూరంలో ఉందని, మరి అలాంటప్పుడు నీరు సముద్రంలో కలుస్తుందని క్లారిటీ లేకుండా ఎలా చెప్తారన్నారు.
ఆలమట్టి ప్రాజెక్ట్ ఎత్తు పెంపుకు కృష్ణా ట్రిబ్యునల్-–2 ఇచ్చిన అవార్డును సవాల్ చేస్తూ 2014 లో ఉమ్మడి ఏపీ సుప్రీంకోర్టును ఆశ్రయించగా.. జస్టిస్ బ్రిజేశ్ కుమార్ ట్రిబ్యునల్ అవార్డును కేంద్రం అమలు చేయాలని కర్నాటక ప్రభుత్వం ఇంటర్ కేటరీ అఫికేషన్ (ఐఏ) వేసింది. ఈ ఐఏను సోమవారం జస్టిస్ డీవై చంద్రచూడ్ ఆధ్వర్యంలోని త్రిసభ్య బెంచ్ విచారించింది. 2007 నుంచి ఎగువ రాష్ట్రాలు ఎంత నీరు వాడాయో, ఎంత మళ్లించాయో లెక్కలు తేలాల్సి ఉందని వైద్యనాథన్ కోర్టు దృష్టికి తీసుకెళ్లారు. ఆ లెక్కలు తేలే వరకు ఈ ఐఏను విచారించడం సబబుకాదని విన్నవించారు. తర్వాత కేంద్రం, కర్నాటక రాష్ట్ర ప్రభుత్వాల వాదనలు విన్నాక విచారణను డిసెంబర్ 13కు వాయిదా వేసింది.
