ఐటీ అంటేనే గుర్తొచ్చేది బెంగళూరు సిటీ. దేశంలోనే ఎక్కువ శాలరీలు ఇచ్చే నగరాల్లో తొలిస్థానంలో ఉంది. ఇప్పుడు బెంగళూరుకు దీటుగా ఐటీ ఉద్యోగులకు జీతాలిస్తోంది హైదరాబాద్. దేశంలో బెంగళూరు తర్వాత, హైదరాబాద్లోని ఐటీ కంపెనీలే ఎక్కువ జీతాలు చెల్లిస్తున్నట్లు రాండ్‌‌స్టాడ్ ఇన్‌‌సైట్స్ శాలరీ ట్రెండ్స్ రిపోర్ట్–2019 వెల్లడించింది. దేశవ్యాప్తంగా వివిధ సిటీల్లో సుమారు లక్ష మంది ఉద్యోగులపై స్టడీ చేసి ఈ రిపోర్టు తయారు చేసింది.
సీనియర్ కన్సల్టెంట్కు 33.95 లక్షలు
సీనియర్ కన్సల్టెంట్కు ఏడాదికి సగటున రూ.35.45 లక్షలు చెల్లిస్తుండగా, మిడ్ లెవల్ కన్సల్టెంట్కు16.45 లక్షలు, జూనియర్ కన్సల్టెంట్కు రూ.5.27 లక్షలు వరకు చెల్లిస్తూ అత్యధిక జీతాలు ఇచ్చే సిటీగా బెంగళూరు నిలిచింది. సీనియర్ కన్సల్టెంట్కు రూ.33.95 లక్షలు, మిడ్ లెవల్ కన్సల్టెంట్కు రూ.15.7 లక్షలు, జూనియర్ కన్సల్టెంట్కు రూ.5 లక్షలు చెల్లిస్తూ హైదరాబాద్ సిటీ రెండో స్థానంలో ఉంది. సీనియర్ కన్సల్టెంట్కు రూ.32.68 లక్షలు, మిడ్ లెవల్ కన్సల్టెంట్కు రూ.14.5 లక్షలు, జూనియర్ కన్సల్టెంట్కు రూ.4.59 లక్షలు చెల్లిస్తూ ముంబై మూడో స్థానంలో నిలిచింది.
ఐటీ కంపెనీలకు అనువైన సిటీ
హైదరాబాద్ ఐటీ కంపెనీలకు అనువైన ప్రాంతం. ఇక్కడ మౌలిక వసతులతోపాటు నైపుణ్యం గల ఉద్యోగులు ఎక్కువగా ఉండటంతో ఐటీ పరిశ్రమలు వేగంగా అభివృద్ధి చెందుతున్నాయి. చిన్నవి, పెద్దవి కలుపుకుని సుమారు 5 వేలకు పైగా ఐటీ కంపెనీలు ఉన్నాయి. వీటిలో 6 లక్షల మంది వరకు ఉద్యోగులు పనిచేస్తున్నారు. సిటీలో పని చేసే ఉద్యోగులు ఇతర దేశాల ప్రాజెక్టులను విజయవంతంగా ముందుకు తీసుకువెళ్లడంలో కీలకంగా మారుతున్నారు. ‘‘ఆర్టిఫీషియల్ టెక్నాలజీకి సంబంధించిన ప్రాజెక్టులు సిటీలో ఎక్కువున్నాయి. ఉద్యోగులు నిత్యం కొత్త కోర్సులు నేర్చుకుంటూ రాణిస్తున్నారు. దీంతోనే వివిధ కంపెనీలు ఎక్కువ శాలరీలు ఇస్తున్నయ్” అని టీటా అధ్యక్షుడు సందీప్కుమార్ మక్తలా చెప్పారు.
