- బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్ గౌడ్
ముషీరాబాద్, వెలుగు: అసెంబ్లీ ఎన్నికల్లో మాదిరిగానే, లోక్సభ ఎన్నికల్లోనూ బీసీలకు టికెట్ల కేటాయింపులో ప్రధాన రాజకీయ పార్టీలు అన్యాయం చేశాయని బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్ గౌడ్ ఆగ్రహం వ్యక్తం చేశారు. జనాభా ధామాషా ప్రకారం టిక్కెట్లు ఇవ్వలేదన్నారు. దోమలగూడలోని బీసీ భవన్లో సోమవారం నిర్వహించిన బీసీ సంఘాల సమావేశంలో ఆయన మాట్లాడారు.
బీజేపీ 17 ఎంపీ స్థానాల్లో బీసీలకు 5, బీఆర్ఎస్ 6 కేటాయిస్తే.. కాంగ్రెస్ పార్టీ ఇప్పటివరకు ప్రకటించిన 13 మందిలో కేవలం ముగ్గురు బీసీలు ఉండడం శోచనీయమన్నారు. రాజకీయ పెట్టుబడి పెట్టలేరనే నెపంతో అసెంబ్లీ టికెట్లు ఇవ్వలేదని, మరోసారి అదే వైఖరితో కాంగ్రెస్ బీసీలకు అన్యాయం చేస్తోందని మండిపడ్డారు.
ప్రజాపాలన పేరుతో కులపాలన చెయొద్దని సూచించారు. 5 శాతం కూడా లేనటువంటి అగ్రకులాలకు పెద్ద పీట వేసి, మిగిలిన కులాలను విస్మరించడం సరికాదన్నారు. బీసీల రాజకీయ భవిష్యత్తుపై చర్చించి, కార్యాచరణ రూపొందించడానికి ఈ నెల 7న సిటీలో బీసీ సంఘాల ప్రతినిధులతో విస్తృత స్థాయి సమావేశం నిర్వహిస్తున్నట్లు వెల్లడించారు.
బీసీలకు టికెట్లు ఇవ్వని పార్టీలకు లోక్సభ ఎన్నికల్లో బుద్ధి చెబుతామని హెచ్చరించారు. బీసీ కుల సంఘాల జేఏసీ చైర్మన్ కుందారం గణేశ్ చారి, బీసీ సంక్షేమ సంఘం రాష్ట్ర కార్యనిర్వాహక అధ్యక్షులు కుల్కచర్ల శ్రీనివాస్, తాటికొండ విక్రమ్ గౌడ్, మణి మంజరి సాగర్, గొడుగు మహేశ్ యాదవ్, జాజుల లింగం గౌడ్, సమతాయాదవ్, ఇంద్రం రజక, మహేశ్ తదితరులు పాల్గొన్నారు.
