జనగామ, వెలుగు: జనగామ జిల్లాలో దశాబ్దాలుగా అన్యాక్రాంతమైన గైరాన్ భూమిని అధికారులు స్వాధీనం చేసుకొని, తిరిగి నిషేధిత జాబితాలోకి చేర్చారు. స్వాధీనం చేసుకున్న భూమి విలువ బహిరంగ మార్కెట్లో రూ.48 కోట్లుగా ఉంటుంది. వివరాలిలా ఉన్నాయి..
జనగామ జిల్లా బచ్చన్నపేట మండలం సల్వాపూర్లోని 147 సర్వే నంబర్లో 163 ఎకరాల గైరాన్(బంచరాయి) భూమి ఉంది. గైరాన్ భూమిని ప్రైవేట్ వ్యక్తుల చేతుల్లోకి మార్చే అధికారం ఎవరికీ లేదు. అయినప్పటికీ 20 ఏండ్ల కింద ఈ భూమిని అక్రమంగా ప్రైవేట్ వ్యక్తులు కాజేశారు. ఆ తర్వాత చేతులు మారి మ్యుటేషన్లు, పట్టాదారు పాస్బుక్లు, టైటిల్ డీడ్లు జారీ అయ్యాయి. ఈ భూమిపై హైకోర్టులో కేసు కూడా నడుస్తోంది.
కలెక్టర్ ఆదేశాలతో కదిలిన యంత్రాంగం..
ఈ భూమిపై హైకోర్టు సూచనల మేరకు జనగామ కలెక్టర్ సందీప్కుమార్ ఝా విచారణకు ఆదేశించారు. విచారణ నిర్వహించిన ఆఫీసర్లు జరిగిందేమిటో గుర్తించారు. మూలాధార సెటిల్మెంట్ రికార్డు(సేత్వార్)లో గైరాన్గా గుర్తించడంతో పాటు పీవోబీలో చేర్చారు. అయినప్పటికీ భూమిపై ఎలాంటి హక్కు లేని వ్యక్తులు అమ్మకపు దస్తావేజుల ద్వారా చేజిక్కించుకున్నారు. ఈ ల్యాండ్ను రెవెన్యూ డిపార్ట్మెంట్లో ఒక ఆఫీసర్ పట్టా భూమిగా మార్చేసినట్లు గుర్తించారు.
ఆ తరువాత వ్యవసాయేతర అవసరాలకు ఉపయోగపడేలా మార్చడంతో పాటు నిషేధిత జాబితా నుంచి తొలగించారని రెవెన్యూ ఆఫీసర్లు నిర్దారించారు. రూల్స్ ప్రకారం గైరాన్ భూమిని పట్టాగా మార్చే అధికారం కలెక్టర్కు కూడా ఉండదు. విచారణ అనంతరం కలెక్టర్ ఆదేశాలతో రెవెన్యూ ఆఫీసర్లు 84 ఎకరాల భూమిని పంచనామా చేసి స్వాధీనం చేసుకున్నారు.
ఆ తర్వాత దస్తావేజు రిజిస్ట్రేషన్ను రద్దు చేసి 147 సర్వే నంబర్లోని మొత్తం భూమిని స్వాధీనం చేసుకున్నట్లు ప్రకటించారు. మొత్తం163 ఎకరాలు ప్రభుత్వ ఆస్తిగా ప్రకటిస్తూ బోర్డు పెట్టారు. పట్టాను రద్దు చేయడంతో పాటు గైరాన్గా గుర్తిస్తున్నట్లు ప్రకటించి, నిషేధిత జాబితాలోకి చేర్చారు.
ఇదిలాఉంటే ప్రభుత్వం ఇటీవల సవరించిన మార్కెట్ విలువ ప్రకారం బచ్చన్నపేట మండలంలో ఎకరం రూ.3 లక్షల నుంచి రూ.8 లక్షల మధ్య ఉంది. ప్రజ్ఞాపూర్ రోడ్డుకు దగ్గరగా ఉండడంతో ఈ భూమికి బహిరంగ మార్కెట్లో ఎకరానికి రూ.30 లక్షలు పలుకుతోంది. ఈ లెక్కన దీని విలు రూ.48 కోట్లకు పైగానే ఉంటుందని చెబుతున్నారు.
