కూకట్పల్లి జేఎన్టీయూలో విద్యార్థులు, ప్రిన్సిపల్ మధ్య వివాదం మరింత ముదురుతోంది. ప్రిన్సిపల్ అసత్యాలు మాట్లాడుతున్నారంటూ విద్యార్థులు పోస్టర్ తయారుచేశారు. ప్రిన్సిపల్ జయలక్ష్మీ అన్నీ అబద్ధాలు చెబుతున్నారంటూ... ఆమె ఛాంబర్ డోర్కు పోస్టర్ అంటించారు. హాస్టల్స్లో సరైన సౌకర్యాలు లేవంటూ.. గత రెండు రోజులుగా జేఎన్టీయూ క్యాంపస్లో విద్యార్థులు ఆందోళన చేస్తున్నారు. అయితే విద్యార్థులు కావాలనే ఆందోళన చేస్తున్నారని ప్రిన్సిపల్ ఆరోపించారు. హాస్టల్స్లో అన్ని సౌకర్యాలు ఉన్నాయని చెప్పుకొచ్చారు. దీంతో వివాదం మరింత ముదిరింది.
ప్రిన్సిపల్ చెప్పేవన్నీ అబద్ధాలే : విద్యార్థులు
ప్రిన్సిపల్ కుర్చీలో కూర్చొని అబద్ధాలు ప్రచారం చేయటం సమంజసమేనా అంటూ విద్యార్థులు ప్రశ్నించారు. అసలు జయలక్ష్మీ ఎన్నిసార్లు వసతి గృహలను సందర్శించారో సీసీ కెమెరా ఫుటేజ్లను బయట పెట్టగలరా అంటూ ఆగ్రహం వ్యక్తం చేశారు. మీడియాని క్యాంపస్లోకి పిలుచుకోవటానికి తాము ప్రిన్సిపల్ అనుమతులు తీసుకోవాలా అని మండిపడ్డారు. ఎంతమంది నాన్ బోర్డర్స్ని హాస్టల్ నుంచి ఖాళీ చేయించారో, ఆ నివేదికను బహిర్గతం చేయగలరా అని ప్రశ్నించారు. అపాయింట్మెంట్ లేకుండా రోజూ ఎంతమంది విద్యార్థులను కలుస్తున్నారో బయట పెట్టాలన్నారు. వసతి గృహాల్లో ఏం అభివృద్ధి చేశారో శ్వేతపత్రం విడుదల చేయగలరా? అంటూ ప్రశ్నలు సంధిస్తూ విద్యార్థులు పోస్టర్ను ఆవిష్కరించారు. విద్యార్థుల తీరుపై జేఎన్టీయూ యాజమాన్యం ఇప్పటివరకు నోరు మెదపలేదు. ఇది ఇలాగే కొనసాగితే విద్యార్థులు తమ ఆందోళనను ఉదృతం చేసే అవకాశం ఉంది.
