చండ్రుగొండ, వెలుగు : అక్రమంగా తరలిస్తున్న గంజాయిని జూలూరుపాడు పోలీసులు గురువారం పట్టుకున్నారు. సీఐ శ్రీనివాస్ తెలిపిన వివరాల ప్రకారం.. చండ్రుగొండ లోని సాయికృష్ణ పెట్రోల్ బంక్ వద్ద బుధవారం రాత్రి జూలూరుపాడు ఎస్సై పురుషోత్తం ఆధ్వర్యంలో పోలీసులు వాహనాలు తనిఖీ చేస్తున్నారు. ఆ సమయంలో కొత్తగూడెం నుంచి ఎర్రగుంట వైపు వెళ్తున్న పల్సర్ బైక్ ను ఆపి తనిఖీ చేశారు. రూ.1.60 లక్షల విలువైన 8 కిలోల గంజాయి ప్యాకెట్లు దొరికాయి. దీంతో బైక్పై ఉన్న ఇద్దరిని అదుపులోకి తీసుకొని విచారించారు.
నిందితులు ఆంధ్రప్రదేశ్లోని కడప జిల్లా పులివెందుల మండలాలనికి చెందిన గణేశ్, చిత్తూరు జిల్లా కు చెందిన గోపి మంజునాథ్గా గుర్తించారు. గంజాయిని చిత్తూరుకు తీసుకెళ్తున్నట్లు వారు ఒప్పుకున్నారు. వారి నుంచి పల్సర్ బైక్, రెండు సెల్ ఫోన్లు , గంజాయి ప్యాకెట్లను పోలీసులు స్వాధీనం చేసుకున్నారు. ఇద్దరిని అరెస్ట్ చేసి కొత్తగూడెం కోర్డులు హాజరుపర్చినట్టు సీఐ తెలిపారు. గంజాయి పట్టివేతకు సహకరించిన హెడ్ కానిస్టేబుల్ ఆదినారాయణ, కానిస్టేబుల్స్ శివశంకర్, రాంబాబును సీఐ అభినందించారు.
