నాగర్ కర్నూల్, వెలుగు: రెగ్యులరైజ్ చేయాలనే డిమాండ్తో జేపీఎస్లు చేపట్టిన సమ్మె కొనసాగుతోంది. ఎంపీడీవో ఆఫీసుల ఎదుట ఆందోళనలు చేపట్టి తమను రెగ్యులరైజ్ చేయాలని నినాదాలతో హోరెత్తించారు. గురువారం పెంట్లవెల్లి ఎంపీడీవో ఆఫీస్ ఎదుట జేపీఎస్ నాలుగేళ్ల కూతురు ‘కేసీఆర్ తాత నేను నాలుగు నెలల వయసు నుంచి మా అమ్మతో కలిసి డ్యూటీ చేసిన’ ప్లీజ్ రెగ్యులరైజ్ చేయవా అని ప్లకార్డుతో నిరసనలో పాల్గొంది.
పెంట్లవెల్లిలో జేపీఎస్లు మోకాళ్లపై కూర్చొని ధర్నా నిర్వహించారు. నాగర్కర్నూర్ ఎంపీడీవో ఆఫీస్ ఎదుట చేపట్టిన ఆందోళనకు సీఐటీయూ జిల్లా ప్రధాన కార్యదర్శి శ్రీనివాసులు మద్దతు తెలిపారు. కడ్తల్ ఎంపీడీవో ఆఫీస్ ఎదుట మహిళా జేపీఎస్లు ముగ్గులు వేసి నిరసన తెలిపారు. వారికి కల్వకుర్తి ఎమ్మెల్యే జైపాల్ యాదవ్, జాతీయ బీసీ కమిషన్ మాజీ సభ్యులు ఆచారి మద్దతు ప్రకటించారు.
నవాబుపేటలో జేపీఎస్ల నిరసనకు ఉప సర్పంచుల సంఘం రాష్ట్ర అధ్యక్ష్యుడు రాములు నాయక్ సంఘీభావం తెలిపారు. మద్దూరులో జడ్పీటీసీ రఘుపతి రెడ్డి మద్దతు ప్రకటించి, ప్రభుత్వ విధానాలను ఎండగట్టారు.
