- గ్రామస్తులు, అభిమానులను కలవనున్న హీరో, హీరోయిన్లు
అచ్చంపేట, వెలుగు: విజయ్ దేవరకొండ, రష్మిక మందన సోమవారం నాగర్కర్నూల్ జిల్లా అచ్చంపేట నియోజకవర్గంలోని బల్మూరు మండలం తుమ్మన్ పేటకు రానున్నారు. ఇటీవల రాజస్థాన్లో వివాహం చేసుకోగా, విజయ్ దేవరకొండ స్వగ్రామమైన తుమ్మన్ పేట గ్రామంలో నిర్వహించే రిసెప్షన్ లో పాల్గొననున్నారు. విజయ్ దేవరకొండ మేనేజర్ కన్నారావు, సమీప బంధువు రామ్మోహన్ రావు ఏర్పాట్లు పర్యవేక్షిస్తున్నారు. 500 నుంచి వెయ్యి మంది వీఐపీలతో పాటు 5 వేల మంది అభిమానులు హాజరుకానున్నట్లు మేనేజర్ తెలిపారు.
వీఐపీలు, అభిమానులకు వేర్వేరుగా భోజన ఏర్పాట్లు చేశామని చెప్పారు. నల్లమలలో పుట్టి పెరిగి సినీ హీరోగా ఎదిగిన విజయ్ దేవరకొండ ఈ ప్రాంత విద్యార్థులకు తనవంతు సాయం అందించేందుకు ముందుకు వచ్చాడు. అచ్చంపేట డివిజన్ లోని 44 గవర్నమెంట్ స్కూళ్లలో 9, 10 తరగతుల్లో ఫస్ట్, సెకండ్ వచ్చిన విద్యార్థులకు రూ.10 వేలు, రూ.5 వేల చొప్పున అందించనున్నట్లు మేనేజర్ తెలిపారు.
