కరీంనగర్ లో జోడు పదవులు అనుభవిస్తున్న ఓ సీనియర్ లీడర్ వ్యవహారం బీఆర్ఎస్ కు తలనొప్పిగా మారింది. ఎన్నికల వేళ ఆయన చేస్తున్న ప్రకటనలు చూసి సొంత పార్టీ కార్యకర్తలే విస్తుపోతున్నారు. ఆయన కామెంట్స్ పార్టీకి మేలు కన్నా కీడే ఎక్కువ చేస్తున్నాయంటూ చెవులు కొరుక్కుంటున్నారు. కరీంనగర్ సిటీలో గతంలో పెద్ద పదవి అనుభవించిన ఆ లీడర్.. రెండేళ్ల క్రితం స్థానిక నేతలతో పొసగక బీఆర్ఎస్ లోనే రెబల్ అవతారమెత్తి తానే ‘కింగ్’నంటూ పార్టీ అధినేతపైనే నిరసన గళం విప్పారు. ఆ తర్వాత మళ్లీ పార్టీలోకి వచ్చి సైలెంటయ్యారు.
Alsoread: బీజేపీవన్నీ దృష్టి మళ్లించే చర్యలే : పవన్‌ ఖేరా
ఈ క్రమంలోనే కరీంనగర్ లో ఒక పదవితోపాటు రాష్ట్ర స్థాయిలో మరో నామినేటెడ్ పదవి చిక్కించుకున్నారు. ప్రస్తుతం ఈ జోడు పదవులు అనుభవిస్తున్న ఆయనకు జిల్లా మంత్రి గంగులతో అస్సలు పొసగడం లేదనే టాక్ వినిపిస్తోంది. ఇటీవల గంగుల ఎన్నిక కేసు విషయంలోనూ సదరు నేత చేసిన కామెంట్స్ పెద్ద చర్చకే దారితీశాయి. ఇక ఆ నేత తన పదవి పరిధిలోకి వచ్చే వ్యాపార సంస్థలపై దాడులు చేయిస్తుండడం కూడా పార్టీకి ఇబ్బందిగా మారింది. వచ్చే ఎన్నికల్లో సదరు నేత పార్టీ గెలుపు కోసం పని చేస్తారా? లేదా అన్న దానిపైనా పార్టీ శ్రేణుల్లోఅనుమానాలున్నాయి.
‑ కరీంనగర్, వెలుగు
