- 16 నెలలుగా కేజీబీవీ టీచర్లకు అందని శాలరీస్
- ఎస్ఎస్ఏ, ఫైనాన్స్ఆఫీసర్ల మధ్య సమన్వయ లోపం
హైదరాబాద్, వెలుగు: సమగ్ర శిక్షా అభియాన్(ఎస్ఎస్ఏ), ఫైనాన్స్ఆఫీస్ విభాగాల మధ్య సమన్వయ లోపంతో కస్తూర్బాగాంధీ బాలికల విద్యాలయాల్లో(కేజీబీవీ) గతేడాది రిక్రూటైన టీచర్లకు శాలరీస్ రావడం లేదు.16 నెలలుగా వేతనాలు లేక వారు తీవ్ర ఇబ్బందులు పడతున్నారు. ఎస్ఎస్ఏ ఆఫీసర్లు మాత్రం సమస్యను పరిష్కరించడం కాకుండా, ఇంకా పెండింగ్లోనే ఉంచాలనే దోరణిలో ఉన్నట్టు కనిపిస్తోంది. రాష్ట్రంలో కేజీబీవీల్లో ఖాళీగా ఉన్న టీచర్(ఎస్ఓలు, పీజీసీఆర్టీ, సీఆర్టీ) పోస్టుల భర్తీకి గతంలో ఎస్ఎస్ఏ నోటిఫికేషన్ ఇచ్చింది. 2019 సెప్టెంబర్లో అందరిని సెలెక్ట్ చేసి, ఉమ్మడి జిల్లాల వారీగా రిక్రూట్ చేసింది. సర్టిఫికెట్ల వెరిఫికేషన్, ఇతర ప్రాసెస్తో ఉమ్మడి ఖమ్మం, కరీంనగర్, నిజామాబాద్, మెదక్ తదితర జిల్లాల్లో సుమారు 90 మంది టీచర్లు కొంచె లేట్ గా రిక్రూట్ అయ్యారు. కొన్ని జిల్లాల్లో ఫిబ్రవరి, మార్చిలో కాగా, ఉమ్మడి ఖమ్మం ఏజెన్సీ ఏరియాలోని సర్టిఫికెట్ల వెరిఫికేషన్ ఆలస్యం కావడంతో గతేడాది అక్టోబర్ లో పోస్టింగ్లు ఇచ్చారు. రిక్రూట్మెంట్ ఫైళ్లను స్టేట్ ఎస్ఎస్ఏ ఆఫీసర్లు.. ఆశాఖ ఫైనాన్స్ విభాగానికి అప్పట్లోనే పంపించారు. అయితే కరోనా తీవ్రతతో విద్యాసంస్థలకు సర్కారు సెలవులు ప్రకటించింది. స్కూళ్లే లేని సమయంలో వీరిని ఎందుకు రిక్రూట్ చేశారని ఫైనాన్స్ ఆఫీసర్లు కొర్రీ పెట్టినట్టు తెలిసింది. దీనిపై ఎస్ఎస్ఏ అధికారులు ఆన్లైన్ క్లాసులు తీసుకుంటున్నారని వివరణ ఇచ్చినా, వారి నుంచి సరైన రెస్పాన్స్ రాలేదని టీచర్ల సంఘాలు తెలిపాయి.
మంత్రి దృష్టికి తీసుకెళ్లినా..
యూనియన్ల లీడర్లు ఈ సమస్యను మంత్రి సబితాఇంద్రారెడ్డితో పాటు విద్యాశాఖ ఉన్నతాధికారుల దృష్టికి తీసుకుపోయారు. దీంతో ఆ ఫైల్కు ఫైనాన్స్ విభాగం ఒకే చెప్పింది. అయితే మళ్లీ ఆ ఫైల్ నెల రోజులుగా ఎస్ఎస్ఏ ఎస్పీడీ వద్ద ఆగిందని టీచర్లు చెప్తున్నారు. నెలల తరబడి జీతాల్లేక అవస్థలు పడుతున్న టీచర్లకు, ఎస్ఎస్ఏ ఉన్నతాధికారులు న్యాయం చేయకుండా కాలయాపన చేసే పనిలో పడ్డారు. ఈ ఇష్యూను ఎస్ఎస్ఏ ఈసీ మీటింగ్లో పెట్టి చర్చించిన తర్వాతే జీతాలు వేస్తామని అధికారులు చెప్తున్నారు. ప్రస్తుతం స్కూళ్లలో పనిచేస్తున్నామని, అయినా తమకు ఎందుకు జీతాలివ్వడం లేదని టీచర్లు ప్రశ్నిస్తున్నారు. తమకు నెలల తరబడి జీతాలు పెండింగ్లో ఉన్నా ఎందుకు స్పందించడం లేదని నిలదీశారు. ఇప్పటికైనా ప్రభుత్వం స్పందించి, కేజీబీవీ టీచర్లకు జీతాలియ్యాలని, లేకపోతే ఆందోళన తప్పదని టీపీటీఎఫ్, టీఎస్యూటీఎఫ్ నేతలు హెచ్చరిస్తున్నారు.