- కేసును సీబీఐకి అప్పగించాలంటూ కోరుట్లలో ముదిరాజ్‌‌ల ర్యాలీ
కోరుట్ల, వెలుగు : జగిత్యాల జిల్లా కోరుట్ల మున్సిపల్ కౌన్సిలర్ పోగుల ఉమారాణి భర్త లక్ష్మీరాజం హత్య కేసును సీబీఐకి అప్పగించాలని ముదిరాజ్ సంఘం నాయకులు డిమాండ్ చేశారు. సోమవారం కోరుట్లలోని అయిలాపూర్ రోడ్డు పెద్దమ్మ దేవాలయం నుంచి కొత్త బస్టాండ్ అంబేద్కర్ విగ్రహం మీదుగా కార్గిల్ చౌరస్తా వరకు భారీ సంఖ్యలో ముదిరాజ్లు ర్యాలీ నిర్వహించారు. కార్గిల్ చౌరస్తా వద్ద హైవేపై బైఠాయించి రాస్తారోకో చేశారు. వారు మాట్లాడుతూ లక్ష్మీరాజం హత్య ముమ్మాటికీ సుపారీ హత్యేనని ఆరోపించారు. కేసును సీబీఐకి అప్పగించాలని డిమాండ్ చేశారు.
లక్ష్మీరాజం భార్య కౌన్సిలర్ ఉమారాణి మాట్లాడుతూ తన భర్త హత్య వెనక చాలా మంది ఉన్నారని, నిందితులను పట్టుకొని న్యాయం చేయాలన్నారు. తర్వాత కార్గిల్ చౌరస్తా నుంచి ర్యాలీగా ఆర్డీవో ఆఫీస్ కు, ఆ తర్వాత పీఎస్కు చేరుకుని వినతి పత్రం ఇచ్చారు. బీసీ సంఘం రాష్ట్ర కార్యదర్శి అరుణ జ్యోతి, ముదిరాజ్ సంఘం రాష్ట్ర ఉపాధ్యక్షుడు బల్ల సత్తయ్య , హన్మాండ్లు, ఉమ్మడి జిల్లా అధ్యక్షుడు గుర్రాల మల్లేశం, లీడర్లు నీలం పెద్దలు, నర్సయ్య, అనంతయ్య, పోచయ్య, రాంబాబు, రాజేశ్‌, పండగ బాలు, చరణ్, శ్రీనివాస్, అశోక్, కుమార్, భాజన్న పాల్గొన్నారు.
