- బోర్డుల గెజిట్ నిలిపేసే ప్రసక్తే లేదు
- మంత్రి గజేంద్ర సింగ్ షెకావత్
హైదరాబాద్, వెలుగు: కృష్ణా, గోదావరి రివర్ మేనేజ్మెంట్ బోర్డుల గెజిట్ నోటిఫికేషన్ ఇప్పటికే అమల్లోకి వచ్చిందని, కాబట్టి దాన్ని నిలిపేసే ప్రసక్తే లేదని కేంద్ర జలశక్తి శాఖ మంత్రి గజేంద్ర సింగ్ షెకావత్ తేల్చి చెప్పారు. సోమవారం రాజ్యసభలో బీజేపీ ఎంపీ జీవీఎల్ నర్సింహారావు అడిగిన ప్రశ్నకు ఆయన సమాధానమిచ్చారు. నోటిఫికేషన్ వచ్చిన 60 రోజుల్లోగా ఒక్కో బోర్డుకు రూ.200 కోట్ల చొప్పున రెండు రాష్ట్రాలు సీడ్ మనీ ఇవ్వాల్సి ఉందని, కానీ, గోదావరి బోర్డుకు రెండు రాష్ట్రాలూ ఇప్పటిదాకా ఏమీ ఇవ్వలేదని చెప్పారు. కేఆర్ఎంబీకి సీడ్ మనీ ఇచ్చేందుకు రెండు రాష్ట్రాల ఫైనాన్స్ డిపార్ట్మెంట్లు ఓకే చెప్పాయన్న సమాచారం వచ్చిందన్నారు. గెజిట్లోని రెండో షెడ్యూల్లో పేర్కొన్న ఒక్క ప్రాజెక్టును కూడా రెండు రాష్ట్రాలు గోదావరి బోర్డుకు అప్పగించలేదన్నారు. ఏపీ ప్రభుత్వం శ్రీశైలంలోని నాలుగు కంపోనెంట్లు, రైట్ బ్యాంక్ పవర్ హౌస్, నాగార్జునసాగర్ కుడి కాలువపై పవర్హౌస్లు అప్పగిస్తూ అక్టోబర్ 14న ఉత్తర్వులు జారీ చేసిందని ఆయన వెల్లడించారు. ప్రాజెక్టుల అప్పగింతపై తెలంగాణ నుంచి ఇప్పటిదాకా ఎలాంటి సమాచారం రాలేదన్నారు. గెజిట్ అమల్లోకి వచ్చిన ఆరు నెలల్లోగా నిర్మాణంలో ఉన్న ప్రాజెక్టుల డీపీఆర్లను సమర్పించి అనుమతులు తీసుకుకోవాల్సి ఉందని తెలిపారు. గోదావరి బోర్డుకు తెలంగాణ ఆరు ప్రాజెక్టుల డీపీఆర్లను ఇచ్చిందని, ఏపీ నుంచి ఎలాంటి డీపీఆర్లూ అందలేదని ఆయన చెప్పారు. కృష్ణా నదిపై నిర్మిస్తున్న ప్రాజెక్టుల డీపీఆర్లను ఇచ్చేందుకు రెండు రాష్ట్రాల ప్రభుత్వాలు టైం కోరాయని చెప్పారు. గెజిట్నోటిఫికేషన్ల అమలు కోసం రెండు బోర్డుల సభ్యులు, రాష్ట్రాల అధికారులతో సబ్ కమిటీలను ఏర్పాటు చేశామని తెలిపారు.
